ओपनर शंकर रानाको शतकीय इनिङ्सको सहयोगमा नेपाल पुलिस क्लबले बिहीबार प्रधानमन्त्री (पिएम) एकदिवसीय कप क्रिकेट प्रतियोगितामा बागमती प्रदेशमाथि सात विकेटको सानदार जित निकालेको छ । मूलपानी मैदानमा सन्दीप लामिछानेको कप्तानीमा रहेको बागमतीले ४९.२ ओभरमा सबै विकेट गुमाएर २६५ रनको योगफल बनाएको थियो । प्रत्युत्तरमा पुलिसले ४४ ओभरमा तीन विकेटको नोक्सानीमा २७१ रन जोड्दै सानदार जित हात पारेको हो ।
जितसँगै पुलिस ४ अंकका साथ शीर्ष स्थानमा उक्लिएको छ । पुलिसले तीनमध्ये दुई खेल जितेको । त्रिभुवन आर्मीको पनि ४ अंक छ । तर, रनरेटमा पछि पर्दा आर्मी दोस्रो स्थानमा रह्यो । बागमती २ अंकसहित छैटौँ स्थानमा छ । पुलिसले बागमतीलाई सहज पाखा लगाउने क्रममा ओपनिङको उत्कृष्ट साथ पायो । ओपनर दिनेश खरेल र शंकरले पहिलो विकेटका लागि २४.५ ओभरमा १५९ रनको साझेदारी गर्दै टोलीलाई जितको आधार खडा गरेका थिए ।
सुवास खत्रीको ओभरमा दिनेश उत्तरम मगरबाट स्टम्पिङ भए । उनले ७५ बलमा आठ चौका र तीन छक्का प्रहार गरी ७० रनको योगदान दिए । इनिङ्सको ४२.६ ओभरमा शतकीय इनिङ्स खेलेका शंकर आउट भए । उनले १२८ बलमा ११६ रन बनाउन १३ चौका र चार छक्का प्रहार गरेका थिए । उनले ११६ बलमा शतक लगाएका थिए । पुलिसले तेस्रो विकेटका लागि ८० बलमा ७८ रन जोडेको थियो । पुलिसको जितमा कप्तान आरिफ शेखले ४७ बलमा तीन चौका र दुई छक्का प्रहार गरी ४३ रनको नटआउट इनिङ्स खेले । यसैगरी, बागमतीले पुलिसलाई २४ अतिरिक्त रन दिएको थियो । जसमा १९ वाइड रह्यो ।
दुई अर्धशतक
पहिलो ब्याटिङ गरेको बागमतीका लागि दुई खेलाडीले अर्धशतकीय इनिङ्स खेलेका थिए । मध्यक्रमका ईशान पाण्डे र पवन थापाले अर्धशतक लगाउँदा बागमतीले पुलिसलाई चुनौतीपूर्ण लक्ष्य दिएको हो । ईशानले ८० बलमा ६ चौका र तीन छक्का प्रहार गरी ७० रन जोडे । पवनले १०१ बलमा ६ चौका र एक छक्काको सहयोगमा सर्वाधिक ७९ रन जोडेका थिए । यी दुवैले चौथो विकेटका लागि १२४ रनको साझेदारी गर्दै टोलीलाई ७१–३ बाट १९५–४ को बलियो स्थितिमा पुर्याए ।
आर्मीको सहज जित
आर्मीले मूलपानी मैदानमा गण्डकी प्रदेशमाथि सात विकेटको जित निकाल्यो । पहिलो ब्याटिङ गरेको गण्डकीले ४९.४ ओभरमा सबै विकेटको गुमाएर २०९ रन जोडेको थियो । प्रत्युत्तरमा आर्मीले ३४ ओभरमा तीन विकेटको क्षतिमा २१० रन जोड्दै २ अंक बटुल्यो । आर्मीको जिजमा कुशल मल्लले अलराउन्ड खेल देखाए । उनले ब्याटिङमा ४२ बलमा ४३ रन तथा बलिङमा १८ रन दिएर दुई विकेट हात पारेका थिए । आर्मीका लागि ओपनर तृतराज दासले ५१ बलमा आठ चौका र एक छक्का प्रहार गरी ५१ रन बनाए । कप्तान विनोद भण्डारीले ५७ बल सामना गरी सात चौका र दुई छक्का प्रहार गरी ५८ रन जोडे ।
