रुपन्देही क्रिकेट संघले खेलाडी कल्याणकारी कोष स्थापन्ना गरी १० राष्ट्रिय खेलाडीलाई मासिक तलब दिने व्यवस्था गरेको छ । रुपन्देहीका विभिन्न क्षेत्रका जनप्रतिनिधिहरूले आफ्नो तलबबाट खेलाडीको मासिक पारिश्रमिकमा सहयोग गर्ने घोषणा गरेका छन् ।
खेलाडीलाई मासिक तलब दिने रुपन्देही पहिलो जिल्ला क्रिकेट संघ बनेको छ । संघका अध्यक्ष हरिबहादुर थापाले बुबाको स्मृतिमा एक लाख रुपैयाँ कल्याणकारी कोष स्थापना गरी खेलाडीलाई सुविधा प्रदानको सुरु गरेका हुन् । नेपालमा क्रिकेट र फुटबलमा आबद्ध राष्ट्रिय खेलाडीले मात्र सम्बन्धित केन्द्रीय संघबाट मासिक पारिश्रमिक लिन्छन् ।
खेलाडीले आफू आबद्ध जिल्ला संघबाट मासिक रूपमा पारिश्रमिक पाउन लागेको यो नै पहिलोपटक हो । रुपन्देहीका पुरुष यू–१९ क्रिकेट टोलीका कप्तान देव खनाल, कृष्ण कार्की, स्पिनर अनिल खरेल, युवा तीव्र गतिका बलर दुर्गेश गुप्ता, यू–१६ का सन्तोष यादव र सागर गैरेले रुपन्देही जिल्ला क्रिकेट संघबाट पारिश्रमिक लिनेछन् । संघले महिला क्रिकेट टोलीकी सदस्य कृतिका मरासिनी, आस्मा पुलामी मगर र सुस्मिता भुसाललाई पनि सोही सुविधा प्रदान गर्ने जनाएको छ । सियारी गाउँपालिका अध्यक्ष थानेश्वर घिमिरेले क्रिकेट खेल र खेलाडीको विकासका लागि आर्थिक सहयोग गर्ने घोषणा गरेका हुन् ।
‘रुपन्देही क्रिकेट खेलका लागि उर्वरभूमि भएकाले यसको विकास र संरक्षणका लागि राज्यस्तरबाट पनि पर्याप्त सहयोग पाउनुपर्छ,’ घिमिरेले भने । संघका सचिव सञ्जय गुरुङले कल्याण कोषको स्थापनापछि खेलाडीलाई आर्थिक रूपमा सबल बनाउने प्रयास भएको बताए । उनले कोषबाट घाइते र विपन्न खेलाडीलाई पनि सहयोग गर्ने बताएका छन् । ‘हामीले स्थापना गरेको कोषले भविष्यमा ठूलो आकार लिनेछ,’ गुरुङले भने, ‘यो एउटा सानो प्रयासमा मात्र हो, कोष खडा गर्न रुपन्देहीवासीको ठूलो हात छ ।’
वडा २ का अध्यक्ष जनार्दन यादवले चार वर्षसम्म मासिक १० हजार कल्याणकारी कोषमा रकम जम्मा गर्ने जानकारी दिएका छन् । यसैगरी, सिद्धार्थनगर नगरपालिकाकी उपप्रमुख उमा अधिकारीले पनि कल्याणकारी कोषमा २५ हजार रुपैयाँ प्रदान गर्ने भएकी छिन् । लुम्बिनी नेत्रालयसँग खेलाडीको उपचारमा ५० प्रतिशत छुट गर्ने विषयमा पनि सम्झौतापत्रमा हस्ताक्षर भएको छ । सियारी गाउँपालिकाका वडा १ का अध्यक्ष अरुणकुमार शाहीले आफ्नो कार्यकालभरि नै खेलाडीलाई दिइने मासिक तलबमा प्रतिमहिना २६ हजार रुपैयाँ सहयोग गर्ने घोषणा गरेका छन् ।
मासिक पाँच हजार रुपैयाँ
संघले १० खेलाडीलाई मासिक पाँच हजार पारिश्रमिक दिनेछ । सिनियर टोली, यू–१९ र यू–१६ का समान दुई खेलाडीले मासिक पाँच हजार रुपैयाँ थाप्ने संघले जनाएको छ । यसैगरी, तीन राष्ट्रिय महिला खेलाडीले पनि यसै महिनादेखि मासिक पाँच हजार रुपैयाँ पाउनेछन् । ‘नेपालको क्रिकेट विकासमा रुपन्देहीको योगदान बृहत् छ, यस क्षेत्रलाई क्रिकेटको उर्वर भूमिका रूपमा पनि लिने गरिन्छ, यहाँ घरेलु प्रतियोगिता सर्वाधिक हुन्छ,’ सचिव गुरुङले भने ।
संघको आगामी लक्ष्य भनेको सिद्धार्थ रंगशालालाई २०८२ सम्म आइसिसीको एकदिवसीय मान्यताप्राप्त खेल गराउने नै हो । ‘हामीले अबको दुई वर्षभित्र सिद्धार्थ रंगशालामा एकदिवसीय खेल आयोजना गर्ने लक्ष्य राखेका छौँ,’ गुरुङले भने, ‘रुपन्देहीको यस कार्यबाट थप अन्य जिल्लासमेत प्रभावित हुने विश्वास छ ।’
यसैबीच, नेपाल क्रिकेट संघ (क्यान)का कोषाध्यक्ष रोशनकुमार सिंहले क्रिकेट विकासका लागि खेलाडीहरूको प्रोत्साहन आवश्यक रहेको बताए । रुपन्देहीले कल्याणकारी कोष खडा गरी खेलाडीलाई मासिक तलब प्रदान गर्दा आफू निकै खुसी भएको सिंहले बताए । क्यानका सदस्य प्रशान्त विक्रम मल्लले कल्याणकारी कोषले खेलाडीलाई आर्थिक रूपमा समस्या नपर्ने बताए ।
क्रिकेटको बलियो आधार सुपर लिग
क्रिकेटमा रुपन्देही जिल्ला सर्वाधिक बलियो हुनुको पछाडि यहाँ नियमित रूपमा सञ्चालन भइरहेको सुपर लिग नै हो । यहाँ २०५३ देखि रुपन्देही सुपर लिग भइरहेको छ । नेपाली क्रिकेटको सर्वोच्च संस्था क्यान आइसिसीद्वारा निलम्बनमा परेका वेला पनि रुपन्देही सुपर लिग सञ्चालितमा थियो ।
रुपन्देही क्रिकेट संघले सुपर लिगमा ‘ए’ र ‘बी’ डिभिजन गरी सञ्चालन गरिरहेको छ । दुवै लिगमा गरी २० क्लब छन् । बी डिभिजन सुपर लिगमा उत्कृष्ट प्रदर्शन गर्ने चार टोली माथिल्लो डिभिजनमा बढुवा हुनेछन् । शीर्ष लिगमा कमजोर प्रदर्शन गर्ने टोली ‘बी’ डिभिजनमा घटुवा हुनेछन् । लगातार सुपर लिगका कारण नै रुपन्देहीमा प्रतिभाशाली खेलाडी देखिएका छन् ।
