काजकिस्तानका राष्ट्रपति कासिम जोमार्त तोकाएभले शुक्रबार एक टेलिभिजनको माध्यमबाट विना कुनै चेतावनी प्रदर्शनकारीहरूमाथि गोली चलाउन सुरक्षा निकायहरूलाई आदेश दिएका छन् ।
स्थितिलाई नियन्त्रणमा लिनका लागि ‘आतंकवादविरुद्धको अपरेसन’का माध्यमबाट प्रदर्शनकारीहरूलाई ‘ध्वस्त’ पारिने चेतावनीसमेत राष्ट्रपति तोकाएभले दिएका छन् ।
गत जनवरी २ देखि काजकिस्तानमा सरकारविरोधी प्रदर्शन भइरहेको छ । सरकारले पेट्रोलियम पदार्थको मूल्य निर्धारण गर्ने जिम्मा निजी क्षेत्रलाई दिने निर्णय गरेपछि पेट्रोलियम पदार्थको मूल्यमा दुई गुणा वृद्धि भएपछि काजकिस्तानमा आन्दोलन सुरु भएको थियो । काजकिस्तानको पश्चिममा रहेको जनाओजेन सहरबाट सुरु भएको प्रदर्शन हालसम्म देशैभरि फैलिएको छ ।
काजकिस्तान सरकारले जनवरी ४ मा पेट्रोलियम पदार्थको मूल्य पहिलेको भन्दा पनि कम गरिदिने घोषणा गरेको थियो । सरकारले यस्तो निर्णय गरे पनि प्रदर्शन भने रोकिएको छैन । राष्ट्रपति तोकाएभले प्रदर्शनकारीहरूलाई ‘आतंकवादीहरू’ भन्दै सुरक्षाका लागि रसियासमर्थित ‘सामूहिक सुरक्षा सन्धि संगठन’ (सिएसटिओ)समक्ष सहयोग मागेका थिए ।
काजकिस्तानको आन्तरिक मामिला मन्त्रालयका अनुसार पछिल्लो एक हप्तामा २६ प्रदर्शनकारी मारिएका छन् भने तीन हजारभन्दा बढी पक्राउ परेका छन् । त्यस्तै १८ जना प्रहरीको मृत्यु भएको छ । रसियाकाे नेतृत्वमा सिएसटिओका सदस्य देशहरूका सेना जनवरी ६ मा काजकिस्तान पुगेका छन् ।
