अफगानिस्तानमा तालिवानको आक्रामक गतिविधि बढिरहेका वेला अफगानिस्तानका वरिष्ठ अधिकारीले मुलुकमा भएको आमनरसंहार रोक्न दबाब दिन नसकेको भन्दै विश्व समुदायप्रति असन्तुष्टि पोखेका छन् । ती अधिकारीले अफगानिस्तानमा तालिवानलाई र तालिवानको संरक्षण र सहयोग गरेकोमा पाकिस्तानलाई दबाब दिन नसकेको भन्दै आलोचना गरेका हुन् । दुवै पक्षलाई दबाब बढाउनुपर्ने अफगान अधिकारीको भनाइ छ ।
स्थानीय समाचार संस्थाहरूका अनुसार अफगानिस्तानमा युद्ध विस्तार भएसँगै सहरी क्षेत्रमा मानव अधिकार उल्लंघनका घटना बढेका छन्, नागरिक हताहती बढेको छ । ‘पाकिस्तान र तालिवानलाई हिंसा रोक्न दबाब दिनका लागि विश्व समुदायलाई केले रोकिरहेको छ ?’ तालिवानलाई पाकिस्तानले निरन्तर सहयोग गरेको आरोप लगाउँदै अफगानिस्तान सरकारका पब्लिक तथा रणनीतिक मामिलासम्बन्धी महानिर्देशनालयका महानिर्देशक वाहिद ओमरले भनेका छन् । उनले अफगानिस्तानको स्थानीय सञ्चारमाध्यममा यो पनि भनेका छन्, ‘अफगानिस्तानमा आमनरसंहारका घटना बढेका छन् । विध्वंस र लुटपाटका घटना बढेका छन् । यसका लागि तालिवान र उसको संरक्षणकर्ता पाकिस्तानलाई दबाबपूर्ण तरिकाले रोक्न विश्व समुदायलाई केले रोकेको छ, हामीले बुझ्न सकेनौँ ।’
अमेरिकाले अफगानिस्तानका सहरी क्षेत्रमा तालिवानको हिंसात्मक आक्रामक गतिविधि बढेकोमा निन्दा गरिसकेको छ । अफगानिस्तानस्थित अमेरिकी दूतावासले हेल्मन्ड, निमरोज, जोओजान प्रान्तमा तालिवानका हिंसात्मक घटनाप्रति आपत्ति जनाएको छ । संयुक्त राष्ट्रसंघीय सुरक्षा परिषद्को विशेष बैठकमा शुक्रबार सदस्य मुलुकहरूले पनि अफगानिस्तानको परिस्थितिप्रति चिन्ता व्यक्त गर्दै राजनीतिक समाधानमा जोड दिएका छन् ।
बैठकमा संयुक्त राष्ट्रसंघका लागि अफगानिस्तानका राजदूत घुलाम इसाकजाईले तालिवानलाई पाकिस्तानले सप्लाई चेनमा सहयोग गरिरहेको प्रमाण सरकारसँग रहेको र सुरक्षा परिषद्लाई प्रमाण उपलब्ध गराउन तयार रहेको दाबी गरेका छन् । उनले यस सन्दर्भमा पाकिस्तान सरकारसँग अफगानिस्तान सरकार सम्पर्कमा रहेको पनि उल्लेख गरेका छन् । अफगानिस्तानले तालिवानलाई पाकिस्तानले सहयोग गर्दै आएको आवाज निरन्तर उठाइरहेको छ । राजदूत इसाकजाईले अफगानिस्तानका आतंकवादी समूह पाकिस्तानमा सुरक्षित रूपमा बसेको आरोप लगाउँदै पाकिस्तानले अफगानिस्तानको आग्रहलाई बेवास्ता गरेको पनि टिप्पणी गरेका छन् ।
