नेपालले बिहीबारबाट विश्वकप २०२२ र एसियनकप २०२३ को दोस्रो चरणको छनोटको बाँकी खेल खेल्दै छ । विश्वकप छनोटको अवसर गुमाइसकेको नेपालले एसियनकप छनोटमा पर्ने सम्भावना भने बलियो बनाउने अपेक्षा गरिएको छ ।
कोरोना भाइरस (कोभिड– १९) महामारीका कारण रोकिएको विश्वकप २०२२ र एसियनकप २०२३ अन्तर्गत दोस्रो चरणको छनोटका बाँकी खेल बिहीबारबाट सुरु हुँदै छन् । नेपालले बिहीबार नै चाइनिज ताइपेईसँग प्रतिस्पर्धा गर्दै छ ।
आगामी वर्ष कतारले फिफा विश्वकप र दुई वर्षपछि चीनले एसियनकप आयोजना गर्दै छन् । छनोट प्रतियोगिताले ती प्रतिस्पर्धामा खेल्ने अवसर दिनेछ । नेपालले विश्वकपको अवसर लगभग गुमाइसके पनि एसियनकपका लागि भने छनोट सम्भावना जीवितै छ । त्यसका लागि नेपाललाई चाइनिज ताइपेईविरुद्धको खेलमा जित आवश्यक छ । विश्वकप २०२२ का लागि भने नेपालको सम्भावना गणितीय रूपमा मात्रै बाँकी छ ।
तुलनात्मक रूपमा सहज प्रतिद्वन्द्वी चाइनिज ताइपेईविरुद्ध नेपालले जितकै लक्ष्य बनाएको छ । गत शनिबार मात्रै इराकजस्तो बलियो टोलीसँग सशक्त प्रदर्शन गरेर प्रतिस्पर्धाका लागि कुवेत पुगेको नेपाली टोली चाइनिज ताइपेईविरुद्धको खेलअघि उत्साहित पनि देखिएको छ ।
यद्यपि, कुवेतको गर्मी नेपाली टोलीका लागि बाधक बन्न सक्छ । नेपाली टोलीका कुवेती प्रशिक्षक अब्दुल्लाह अलमुताइरीले नेपाली टोलीलाई कुवेतको वातावरणमा घुलमिल हुन मुस्किल देखिएको जनाएका छन् ।
‘खेलाडीहरू उत्साहित छन् । यद्यपि, उनीहरूलाई यहाँको गर्मीमा सहज भइरहेको छैन । उनीहरूलाई यहाँको वातावरणमा एडजस्ट हुन मुस्किल भइरहेको छ,’ ताइपेईसँगको खेलअघि नेपाली टोलीका प्रशिक्षक अलमुताइरीले भने, ‘हाम्रा लागि वातावरण चुनौतीपूर्ण बनेको छ ।’
कुवेतको गर्मीलाई झेल्न सके युवा खेलाडीहरूले भरिएको नेपाली टोलीले ताइपेईविरुद्ध जितकै नतिजा निकाल्ने अपेक्षा गरिएको छ । नेपाली टोली पछिल्लो साता दिनदेखि अरबको भ्रमणमा छ ।
नेपालले गत शनिबार इराकसँग मैत्रीपूर्ण खेल खेलेको थियो । नेपाल उक्त खेलमा ६–२ ले पराजित भयो । तर, कुवेतको जस्तै गर्मी मौसममा नेपाली टोलीले फिफा वरीयतामा आफूभन्दा एक सय तीन स्थानमाथि रहेको इराकविरुद्ध प्रशंसनीय प्रदर्शन गरेको थियो । त्यो प्रदर्शनलाई निरन्तरता दिन सकेको अवस्थामा नेपाली टोली आफ्नो उद्देश्यमा सफल हुनेछ ।
ताइपेईविरुद्ध यसअघि भएको खेलको नतिजाले पनि नेपाली खेलाडीलाई हौसला दिनेछ । नेपालले ताइपेईविरुद्ध यसअघि दुईपटक मात्रै प्रतिस्पर्धा गरेको छ । त्यो पनि उसकै मैदानमा । जेठ र भदौ २०७६ मा भएका यी दुईमध्ये पहिलो खेलमा नेपालले बराबरी र दोस्रो खेलमा जित निकालेको थियो । नेपालले ताइपेईविरुद्ध यसै प्रतियोगिताको पहिलो चरणको खेलमा जित हात पारेको हो । समग्रमा नेपाल ताइपेईविरुद्ध अपराजित छ ।
पछिल्लो समय निरन्तर कमजोर प्रदर्शनबाट गुज्रिरहेको ताइपेई टोली कोरोना भाइरस महामारी सुरु भएपछि पहिलोपटक अन्तर्राष्ट्रिय प्रतिस्पर्धामा निस्कँदै छ । त्यसमाथि उसका केही महत्वपूर्ण खेलाडी यसपटक टोलीमा छैन । विदेशी लिगमा सहभागी उसका खेलाडी कोरोना भाइरस महामारीका कारण आउन नसकेको ताइपेईले जनाएको छ । यो अवस्थामा ताइपेईले पनि युवा खेलाडीलाई नै लिएर प्रतियोगितामा सहभागी हुन कुवेत पुगेको छ ।
विपक्षी टोलीको यी कमजोरीलाई सदुपयोग गर्न सके नेपाली टोलीले जितको नतिजासँगै कुवेतमा आफ्नो सुखद यात्रा सुरु गर्नेछ । त्यसले २४ जेठमा जोर्डन र २८ जेठमा अस्ट्रेलियासँग प्रतिस्पर्धा गर्दा पनि नेपाली टोली उच्च मनोबलमा हुनेछ ।
नेपाल एसियनकपका लागि यसरी छनोट हुन सक्छ
विश्वकप २०२२ तथा एसियनकप २०२३ को दोस्रो चरणको जारी एसियाली छनोटमा ४० टोली सहभागी छन् । जसलाई पाँच–पाँच टोली पर्ने गरी आठ समूहमा बाँडिएको छ । नेपाल यो छनोटको समूह बिमा छ । दोस्रो चरणको छनोटबाट आठ समूहको शीर्ष स्थानमा रहने आठ र आठै समूहको दोस्रो स्थानमा रहेकामध्ये उत्कृष्ट चार गरी १२ टोली सन् २०२३ मा चीनमा आयोजना हुने एएफसी एसियनकपका लागि छनोट हुनेछन् ।
दोस्रो स्थानका बाँकी चार, आठै समूहमा तेस्रो स्थानमा रहेका आठ र चौथो स्थानमा रहेका आठमध्ये उत्कृष्ट चार गरी १६ टोली एसियनकप ०२३ को लागि हुने तेस्रो तथा अन्तिम चरणको छनोटमा पुग्नेछन् ।
चौथो स्थानको बाँकी चार र आठै समूहको पाँचौँ स्थानमा रहेका आठ टोलीले भने एसियनकप ०२३ का लागि तेस्रो चरणको छनोट प्रतियोगितामा पुग्न प्लेअफ खेल खेल्नेछन् । होम एन्ड अवेका आधारमा दुई लेगमा हुने प्लेअफ प्रतिस्पर्धाबाट आठ टोलीले तेस्रो तथा अन्तिम चरणको छनोटमा स्थान सुरक्षित गर्नेछ ।
तेस्रो तथा अन्तिम चरणको खेलमा २४ टोलीले प्रतिस्पर्धा गर्नेछ । २४ टोलीलाई चार–चार टोली पर्ने गरी ६ समूहमा विभाजन गरिनेछ । समूहको खेल होम एन्ड अवे प्रणालीमा हुनेछन् । आयोजक चीन सहभागी भए एसियनकप ०२३ का लागि अन्तिम चरणको छनोट प्रतियोगिताबाट १२ टोली र चीन सहभागी नभए ११ टोली छनोट हुनेछन् ।
नेपाल अहिले दोस्रो चरणको छनोटको समूह बीको चौथो स्थानमा छ । नेपालले चौथो स्थानमा रहेर दोस्रो चरणको छनोट टुंग्गाए र चौथो स्थानमा रहेका अन्य सात समूहका टोलीमध्ये उत्कृष्ट चारमा पर्न सके सीधै तेस्रो चरणको छनोट प्रतियोगितामा स्थान सुरक्षित गर्नेछ । यदि, त्यो सम्भव नभए नेपालले तेस्रो तथा अन्तिम चरणको छनोट प्रतियोगितामा पुग्नकै लागि प्लेअफ खेल्नुपर्नेछ ।
कुवेतको गर्मी चुनौतीपूर्ण : अब्दुल्लाह अलमुताइरी, मुख्य प्रशिक्षक, नेपाल
कुवेतको गर्मीमा फुटबल खेल्न सहज हुनेछैन । त्यसैले यो खेल नेपाल र चाइनिज ताइपेई दुवै टोलीका लागि मुस्किल हुनेछ । यद्यपि, इराकसँगको मैत्रीपूर्ण खेलमा पराजयका बाबजुद हामीले धेरै कुरा सिकेका छौँ । त्यसैले हामी जितकै लागि खेल्नेछौँ । यो छनोट प्रतियोगितामा हामी कम्तीमा चौथो स्थान सुरक्षित गर्न चाहन्छौँ । त्यसले एसियाकपका लागि हाम्रो सम्भावना पनि जीवित बनाइराख्ने छ । त्यसका लागि ताइपेईविरुद्ध हामीलाई जित आवश्यक छ । हामीले धेरै मैत्रीपूर्ण खेल खेल्न पाएका छैनौँ । हामीसँग युवा खेलाडीको धेरै छन् र उनीहरू उत्तिकै क्षमतावान् पनि छन् । हामीले उनीहरूमाथि धेरै दबाब पनि दिन सक्दैनौँ । ताइपेईको टोलीमा पनि नयाँ खेलाडीको बाहुल्यता रहेको छ ।
नेपालको टोली राम्रो छ’: भोम का–नुह्म, मुख्य प्रशिक्षक,चाइनिज ताइपेई
कुवेतको गर्मी हाम्रा लागि पनि कठिन छ । यो वातावरणमा घुलमिल हुन हाम्रो लागि पनि मुस्किल भएको छ । त्यसमाथि हामी बलियो टोलीसँग प्रतिस्पर्धा गर्दै छौँ । नेपालको सन्तुलित टोली छ । उनीहरूको रक्षापंक्ति र आक्रमण दुवैमा राम्रो छ । विदेशी लिगहरूमा खेलिरहेका हाम्रा मुख्य खेलाडी कोरोना भाइरसका कारण टोलीमा सहभागी हुन सकेनन् । उनीहरूको स्थानमा नयाँ खेलाडी लिएर आएका छौँ । आशा छ कि नयाँ खेलाडीहरूले सिनियर खेलाडीको स्थान लिनेछन् ।
नेपाली टोली
गोलरक्षक : किरणकुमार लिम्बू, दीप कार्की, विशाल सुनार, रक्षक : अनन्त तामाङ, गौतम श्रेष्ठ, सुमन अर्याल, रोहित चन्द, दिनेश राजवंशी, विकास खवास, मिडफिल्डर : पुजन उपरकोटी, एरिक विष्ट, सुमन लामा, मनीष डाँगी, सन्तोष तामाङ, सुरजजिउ ठकुरी, कमल थापा, विशाल राई, सुनील बल, आयुष घलान, स्ट्राइकर : नवयुग श्रेष्ठ, आशिश लामा, अञ्जन विष्ट, अभिषेक रिजाल, सुमन लामा, प्रशिक्षक : अब्दुल्लाह अलमुतइरी
फिफा वरीयता
नेपाल : १७१
चाइनिच ताइपेई : १४१
खेल : विश्वकप तथा एसियाकप छनोट
नेपालविरुद्ध चाइनिज ताइपेई
समय : राति ९ः४५ बजे (जाबर अल हमाद स्टेडियम)
हेड टु हेड
नेपाल १–१ चाइनिज ताइपेई (२३ जेठ २०७६, मैत्रीपूर्ण खेल)
नेपाल २–० चाइनिज ताइपेई (२४ भदौ २०७६, विश्वकप तथा एसियाकप छनोट)
