सिटिजन्स बैंक इन्टर्नेसनल लिमिटेडले बुटवलमा प्रधान कार्यालय रहेको तिनाउ मिसन डेभलपमेन्ट बैंक लिमिटेडलाई प्राप्ति गर्ने अन्तिम सम्झौतापत्रमा हस्ताक्षर गरेको छ । बैंकका सञ्चालक तथा मर्जर तथा प्राप्ति समितिका संयोजक प्रवलजंग पाण्डे र तिनाउ मिसन डेभलपमेन्ट बैंकका सञ्चालक तथा मर्जर तथा प्राप्ति समितिका संयोजक राजेन्द्रप्रसाद ओझाले सम्झौतापत्रमा हस्ताक्षर गरेका हुन् ।
दुवै बैंकले आ–आफ्नो विशेष साधारणसभाबाट प्राप्तिसम्बन्धी प्रस्ताव पारित गरी नेपाल राष्ट्र बैंकको अन्तिम स्वीकृतिपछि एकीकृत कारोबार सुरु गरिने बैंकले जनाएको छ । २०७७ साल पुस २२ गतेसम्मको तथ्यांकका आधारमा सिटिजन्स बैंकले तिनाउ मिसन डेभलपमेन्ट बैंकलाई प्राप्ति गरेपछि सर्वसाधारणबाट उठाएको निक्षेप करिब १ खर्ब २४ अर्ब रुपैयाँ पुग्ने जनाइएको छ ।
त्यस्तै, ऋण लगानी करिब १ खर्ब २ अर्ब रुपैयाँ पुग्ने जनाइएको छ । प्राप्तिपश्चात् बैंकको कुल शाखा संख्या १ सय ६३ हुने बैंकले जनाएको छ । यस प्रक्रियामा तिनाउ मिसनका सेयरधनीले १ सय कित्ता सेयरबराबर सिटिजन्स बैंकको ९६ कित्ता सेयर पाउने जनाइएको छ । बैंकको हाल चुक्ता पुँजी ९ अर्ब ८१ करोड रुपैयाँ रहेकोमा प्राप्तिपछिको ११ अर्ब ६६ करोड रुपैयाँ हुने बैंकले जनाएको छ ।
