पिसिआर रिपोर्टविना हुम्ला प्रवेशमा निषेध

कोभिड– १९ को प्रकोपबाट हालसम्म ग्रिनजोनका रूपमा रहेको हुम्लालाई ग्रिनजोनकै रूपमा राख्न अब पिसिआर रिपोर्टविना हुम्ला जिल्ला  प्रवेशमा निषेध गरिएको छ ।  जिल्ला भित्रिँदा अनिवार्य  पिसिआर चेकजाँच गरी मात्रै आउन पाउने गरी  जिल्ला विपत् व्यवस्थापन समितिले निर्णय गरेको छ । 

कोभिड– १९ को रोकथाम नियन्त्रण र व्यवस्थापन गर्नका लागि सिमकोट विमानस्थलमा हेल्थ डेक्स राखिने भएको छ । नेपालगन्ज, सुर्खेत र काठमाडौंबाट हवाईमार्गबाट हुम्ला आउने यात्रुहरूले पिसिआर गरे–नगरेको चेकजाँच गर्नेछ । जिल्लाका दक्षिणी नाका मुगु र बाजुराको कवाडी नाकाबाट हुम्ला प्रवेश गर्नेहरूका लागि पनि कडा निरागनी र चेकजाँच गरिने भएको छ ।

यसका लागि सहायक प्रमुख जिल्ला अधिकारी दत्तराज हमालको संयोजकत्वमा पाँच सदस्यीय व्यवस्थापन कमिटी गठन गरिएको छ ।

जिल्लामा संकलन गरिएको स्वाबको छिटोछरितो  परीक्षण व्यवस्थापनका लागि कर्णाली प्रदेश सरकारसँग पिसिआर मेसिन खरिद र अन्य व्यवस्थापन खर्चका लागि चार करोड बजेट माग गर्ने निर्णय गरिएको जानकारी प्रमुख जिल्ला अधिकारी चिरञ्जीवी गिरीले दिए ।