कोरोना (कोभिड– १९) संक्रमण भएका कतिपय नागरिकलाई समाजमा अपहेलनासहित सामाजिक बहिस्कार गरेका घटना सार्वजनिक भइरहँदा दोलखामा भने कोरोना जितेकाहरूलाई सम्मानपूर्वक बिदाइ गरिएको छ । विभेद गरिएका कतिपय घटनालाई लक्षित गरी यस्ता घटनाको अन्त्य गर्न र संक्रमितको मनोबल उच्च बनाउन सम्मानपूर्वक घर पठाइएको हो । बुधबार दोलखाका सातजना कोरोनामुक्त भई घर फर्किएका छन् ।
चरिकोटस्थित आइसोलेसनमा रहेका उनीहरूमा दोस्राेपटकको पिसिआर परीक्षणमा पनि नेगेटिभ रिपोर्ट आएपछि बुधबार डिस्चार्ज गरेको स्वास्थ्य कार्यालय दोलखाले जनाएको छ । उनीहरूलाई स्वास्थ्यसम्बद्ध निकायका प्रमुखहरूको उपस्थितिमा सम्मान गर्दै बिदाइ गरिएको थियो । स्वास्थ्य कार्यालयको प्रांगणमा आयोजित कार्यक्रममा सातैजनालाई टीका र खादा लगाएर डिस्चार्ज गरेको प्राथमिक स्वास्थ्य केन्द्र चरिकोटकी प्रमुख डा. रिना लामिछानेले जनाएकी छिन् । उनले समाजमा सकारात्मक सूचना प्रवाह र बहिस्कारका घटना हुन नदिन विशेष तरिकाले बिदाइ गरेको बताइन् ।
उनीहरूको २ भदौमा गरिएको पिसिआर परीक्षणमा कोरोना पोजेटिभ देखिएको थियो । डिस्चार्ज हुनेहरूमा चितवनको तालिममा सहभागी भएर फर्किएका चारजना गैरसरकारी संस्थाका प्रतिनिधि, दुईजना सुरक्षाकर्मी र एक स्वास्थ्यकर्मी थिए ।
