सरकारले विनातामझाम जापानको आइची नागोयामा आयोजना भएको २०औँ एसियाली खेलकुद (एसियाड) मा कांस्य पदक जितेका खेलाडी, प्रशिक्षक र व्यवस्थापकको खातामा पुरस्कार रकम जम्मा गरेको छ ।
बैंक खातामा बुधबार पुरस्कार रकम जम्मा गरेको कराँतेका मुख्य प्रशिक्षक कुशल श्रेष्ठ र कबड्डी कप्तान मानमती विष्टले जानकारी दिए । दुई खेलका खेलाडी, प्रशिक्षक र व्यवस्थापकले कुल ३५ लाख १० हजार रुपैयाँ प्राप्त गरेका छन् । यसै महिनाको पहिलो साता २०औँ एसियाड सकिएको थियो । कराँतेका तेन्जिङ शेर्पा र नेपाली महिला कबड्डी टोलीले नेपाललाई कांस्यपदक दिलाएका थिए ।
महिला कबड्डीले लगातार एसियाडमा कांस्य हात पारेको थियो । २०औँ एसियाडमा नेपाललाई पहिलो पदकका रूपमा कांस्य दिलाएको कराँतेका प्रशिक्षक श्रेष्ठले द्रुत गतिमा सरकारले आफ्नो खातामा पुरस्कार रकम जम्मा गरेको बताए ।
‘सरकारले निर्धारित र निर्णय गरेको पुरस्कार रकम डिपोजिट भएको जानकारी गराउन चाहन्छु । द्रुत गतिमा काम भएकोमा धन्यवाद नेपाल सरकार,’ श्रेष्ठले भने । बालेन्द्र शाह नेतृत्वको सरकारले २३ असोजमा बसेको मन्त्रिपरिषद्को बैठकबाट एसियाडमा पदक विजेता खेलाडीलाई पुरस्कार तत्काल वितरण गर्ने निर्णय गरेको थियो ।
राष्ट्रिय खेलकुद विकास नियमावलीअनुसार सरकारले पदक विजेता खेलाडी, प्रशिक्षक र व्यवस्थापकलाई पुरस्कार प्रदान गरेको हो । राखेपले यसपटक छनोट नभई वाइल्ड कार्डमार्फत छनोट भएको भन्दै खेलाडीलाई आधा पुरस्कार दिने निर्णय गरेको थियो ।
राष्ट्रिय खेलकुद विकास नियमावली २०७९ अन्तर्गत नियम २८ को उपनियम (३), (६) र (७) अनुसार एसियन खेलकुद प्रतियोगितामा स्वर्ण, रजत र कांस्य जित्ने खेलाडी नगदबाट पुरस्कृत हुने व्यवस्था छ ।
जसअनुसार स्वर्णलाई ३२ लाख ५० हजार, रजतलाई १९ लाख ५० हजार र कांस्यलाई १४ लाख रुपैयाँ प्रदान गरिनुपथ्र्यो । तर, सरकारले छनोट नभएर वाइल्ड कार्डको माध्यमबाट प्रतिस्पर्धा गरेका कारण तोकिएको पुरस्कर रकमको ५० प्रतिशत घटाइएको जनाएको छ । कराँतेको पुरुष ८४ केजीमाथि तौल समूहमा कांस्य पदक जितेका शेर्पाले ६ लाख ५० हजार रुपैयाँ प्राप्त गरेका छन् । उनका मुख्य प्रशिक्षक श्रेष्ठले एक लाख ३० हजार र व्यवस्थापक तथा संघका अध्यक्ष युवराज लामाले ६५ हजार रुपैयाँ प्राप्त गरेका छन् ।
महिला कबड्डी टोलीका १२ खेलाडीले जनही एक लाख ९५ हजार रुपैयाँ प्राप्त गरेका छन् । टोलीकी प्रशिक्षक पार्वती राईले एक लाख ३० हजार तथा सहायक प्रशिक्षक लोकबहादुर विष्ट र टिम व्यवस्थापक शरद दर्शनधारीले जनही ६५ हजार रुपैयाँ पाएका छन् ।
फेरियो सरकारले पुरस्कार दिने चलन
पछिल्ला वर्षमा खेलाडीहरूले अन्तर्राष्ट्रिय खेलकुद प्रतियोगितामा पदक जितेर आउँदा सरकारले घोषणा गरेको रकम पाउन महिनौँ प्रतीक्षा गर्नुपर्ने थियो । सरकारले रकमसहित पुरस्कृत गर्ने घोषणा गरेको दिन भव्य समारोहबिच हुने गथ्र्यो । अक्सर पुरस्कार प्रायः प्रधानमन्त्रीबाट वितरण गरिन्थ्यो ।
प्रधानमन्त्रीबाट पुरस्कृत हुने कार्यक्रम आयोजना हुँदा खेलाडीदेखि अफिसियलसम्म औपचारिक पोसाकमा प्रधानमन्त्री कार्यालय पुग्थे । त्यहाँ घण्टौँको पर्खाइ र लामो भाषणपछि पुरस्कृत खेलाडी तथा अफिसियलले चेक पाउँथे । तर, अहिले यस्तो केही पनि भएन । सरकारले कुनै पनि कार्यक्रम आयोजना नगरी सिधै खेलाडी, प्रशिक्षक र अफिसियलको सिधै खातामा रकम जम्मा गरेको छ ।
- कराँतेका कांस्य विजेता तेन्जिङ शेर्पाले ६ लाख ५० हजार, मुख्य प्रशिक्षक कुशल श्रेष्ठले एक लाख ३० हजार र व्यवस्थापक युवराज लामाले ६५ हजार रुपैयाँ पाए
- लगातार दोस्रोपटक कांस्य जितेको महिला कबड्डी टोलीका १२ खेलाडीले जनही एक लाख ९५ हजार, मुख्य प्रशिक्षक पार्वती राईले एक लाख ३० हजार, सहायक प्रशिक्षक लोकबहादुर विष्ट र व्यवस्थापक शरद दर्शनाधारीले ६५ हजार रुपैयाँ प्राप्त गरे
