नेपाली महिला कबड्डी टोलीले एसियन खेलकुद प्रतियोगिता (एसियाड)मा लगातार दोस्रोपटक कांस्य पदक जितेको छ । जापानको आइची र नागोया सहरमा चलिरहेको २०औँ एसियाडमा शुक्रबार टोकाइ सिटिजन जिम्न्याजियममा भएको सेमिफाइनल प्रतिस्पर्धामा छिमेकी राष्ट्र भारतसँग पराजित भएपछि नेपालको अगाडि पदक यात्रा टुंगिएको हो । सेमिफाइनलमै सीमित भएका महिला खेलाडीले कांस्य पदक जितेका हुन् ।
फाइनल प्रवेशको खेलमा नेपाली टोली भारतसँग ४८–२४ अंक अन्तरले पराजित भयो । यसअघि हाङझाउ एसियाडमा पनि नेपाल भारतसँगै सेमिफाइनलमा ६१–१७ अंकले हारेको थियो । बिहीबार श्रीलंकालाई हराएर नेपालले अन्तिम चारको यात्रा गर्दै कांस्य जित्ने पक्का गरेको थियो ।
भारतले पहिलो हाफमा नेपालविरुद्ध ३१ अंक बटुलेको थियो । प्रत्युत्तरमा नेपालले १७ अंक हात पार्यो । पहिलो हाफको तुलनामा दोस्रोमा नेपाल कमजोर देखिएको थियो । भारतको चर्चित कबड्डी लिगमा आबद्ध खेलाडीको सम्मिलित भारतीय टोलीले दोस्रो हाफमा नेपालविरुद्ध १७ अंक जोडेको थियो । नेपालले आउटबाट १८, बोनसबाट ५ र सुपर ट्याकलबाट १ अंक बटुलेको थियो ।
यसविपरीत भारतले आउटबाट ३५, बोनसबाट ७, अलआउटबाट ६ अंक जोडेको थियो । लगातार दोस्रोपटक सेमिफाइनलमा भारतसँग पराजित हुँदा यसपटक पनि नेपाल फाइनल पुग्न भने सकेन । यद्यपि, पदक भने घर ल्याउने भएको छ । नेपाल समूह ‘बी’को उपाविजेताका रूपमा अन्तिम चारमा पुगेको थियो । समूह चरणमा थाइल्यान्ड र श्रीलंकालाई हराएको नेपाल चाइनिज ताइपेईसँग भने पराजित भएको थियो ।
भारतमै एक महिना प्रशिक्षण
सन् २०२३ मा कांस्य जितेपछि तत्कालीन राखेपका सदस्यसचिव टंकलाल घिसिङले मिसन २६ योजना सार्वजनिक गर्दै महिला कबड्डी टोलीलाई प्रशिक्षणमा राखेको थियो । मिसन २६ मा समावेश खेलमध्ये कबड्डीले एसियाडको अन्तिम तयारी भारतमै गरेको थियो । एक महिना भारतमा प्रशिक्षणमा रहँदा खेलाडीले अनुभवी खेलाडीसँगै प्रशिक्षण गर्ने अवसर पाएका थिए । यसै प्रदर्शनका आधारमा यसपटक नेपालले आफ्नो यात्रा अगाडि बढाउने विश्वास गरिएको थियो ।
तर, भारत नै सेमिफाइनलमा तगारो बनेपछि नेपालको फाइनल पुग्ने सपना पूरा भएन । यसपटक नेपाली टोलीमा ६ नयाँ अनुहार थिए । कप्तान मानमती विष्टसहित जयन्ती बडु, रविना चौधरी, मेनुका राजवंशी, गंगा घिमिरे र सिर्जनाकुमारी थारूबाहेक अन्य खेलाडीले पहिलोपटक एसियाली खेलकुदको अनुभव लिएका हुन् ।
कप्तान मानमतीले सामूहिक प्रयासले गर्दा नै पदक सम्भव भएको बताइन् । ‘हामीले पदकका लागि मिहिनेत गरेका थियौँ । पछिल्लो दुई वर्षदेखि हामी प्रशिक्षणमा थियौँ,’ उनले भनेकी छिन्, ‘पदक जित्नुपर्छ भन्ने लक्ष्य थियो । त्यो पूरा भएको छ ।’ मानमतीको नेतृत्वमा नेपाली टोली पछिल्लो समय अन्तर्राष्ट्रिय कबड्डीमा उत्कृष्ट प्रदर्शन गर्दै आएको छ ।
लगातार म्याच एक्सपोजर
पछिल्लो तीन वर्षमा महिला कबड्डी टोलीले अन्तर्राष्ट्रिय म्याच एक्सपोजर पाएको छ । हाङझाउ एसियाडपछिको तीन वर्षमा टोलीले विभिन्न अन्तर्राष्ट्रिय खेलकुद प्रतियोगितामा सहभागिता जनाउन अवसर पाएको छ । चीनको सान्यामा भएको छैटौँ एसियाली बिच खेलकुदअन्तर्गत महिला कबड्डीमा नेपालले कांस्य पदक जितेको थियो । बिच खेलकुदको सेमिफाइनलमा नेपाल श्रीलंकासँग पराजित भएको थियो । त्यसको बदला लिँदै नेपालले २०औँ एसियाडमा श्रीलंकालाई हराएर कांस्य पक्का गरेको थियो ।
मानमतीको कप्तानीमा नेपालले महिला कबड्डी विश्वकपमा पनि भाग लिएको थियो । नेपालले बंगलादेशसँगको सिरिज र इरानमा भएको एसियाली कबड्डी प्रतियोगितामा पनि सहभागिता जनाएको थियो । यसै म्याच एक्स्पोजरका कारण कबड्डी टोलीले अन्तर्राष्ट्रिय एरिनामा उत्कृष्ट प्रदर्शन गरेको मानिन्छ ।
नेपालसँग १२ वर्षपछि टी–२० आईमा भेट भएको अफगानिस्तान फेरि स्तब्ध
नेपाली पुरुष क्रिकेट टोलीले १२ वर्षपछि टेस्ट राष्ट्र अफगानिस्तानलाई हराएको छ । नेपालले शुक्रबार २०औँ एसियाली खेलकुद (एसियाड) प्रतियोगिताअन्तर्गत क्रिकेट विधामा अफगानिस्तानमाथि पाँच विकेटको सानदार जित निकालेको हो । सन् २०१४ को आइसिसी टी–२० विश्वकपको समूह चरणमा नेपालले आफ्नो पहिलो टी–२० आई खेलमै अफगानिस्तानमाथि नौ रनको रोमाञ्चक जित निकालेको थियो ।
समग्रमा नेपाल र अफगानिस्तानबिच दोस्रोपटक टी–२० आईमा भेट भएको हो । नेपालले दुवै भेटमा अफगानिस्तानलाई निराश बनाएको छ । अफगानिस्तानमाथिको जितले नेपाल समूह ‘ए’बाट समूह विजेताका रूपमा अगाडि बढ्ने मौका पाएको छ । नेपालले अब शुक्रबार आयोजक जापानसँग प्रतिस्पर्धा गर्नेछ ।
अफगानिस्तानले टस जितेर ब्याटिङ गर्दै सात विकेट गुमाएर एक सय दुई रन बनाएको थियो । प्रत्युत्तरमा नेपालले १६.१ ओभरमा पाँच विकेट गुमाउँदै सानदार जित निकाल्यो । नेपालसँग हारेको अफगानिस्तानले दुई खेलबाट दुई अंक जोडेको छ ।
नेपालको जितमा स्पिनरले दमदार प्रदर्शन गरेका थिए । ललित राजवंशी र कुशल भुर्तेलले समग्रमा सात विकेट हात पारे । ब्याटिङमा सन्दीप जोरा र पूर्वकप्तान रोहितकुमार पौडेलले सुदृढ ब्याटिङ प्रदर्शन गरेका थिए ।
कप्तान दीपेन्द्रले बलरका कारण खेल सहज भएको बताए । ‘टस हारे पनि हामीले ब्याटिङ नै गर्ने सोचेका थियौँ । विशेषगरी स्पिनरहरू ललित र कुशल भुर्तेलले राम्रो गरे,’ दीपेन्द्रले भने, ‘जापानविरुद्ध पनि हामी आफ्नै खेल खेल्नेछौँ । यसपटक हामी पदकका लागि प्रतिस्पर्धा गर्दै छौँ ।’
अफगानिस्तानमाथिको जितसँगै नेपालले टी–२० आई वरीयतामा समेत दुई स्थान सुधार गरेको छ । अहिले नेपाल १४औँ स्थानमा पुगेको छ ।
