जर्मनीका एलेक्जेन्डर जेभरेभले युएस ओपन २०२६ को एकलतर्फको उपाधि जितेका छन् । न्युयोर्कको आर्थर ऐस मैदानमा भएको फाइनलमा जेभरेभले अमेरिकाकै बेन सेल्टनलाई हराएका हुन् । खेलमा उनी ६–३, ७–६(२), ५–७ र ६–२ ले विजयी भएका हुन् ।
तीन घण्टा ३३ मिनेट चलेको खेलमा उनी जित निकाल्न सफल भए । विश्व वरीयतामा दोस्रो स्थानमा रहेका जेभरेभले पहिलोपटक युएस ओपनको उपाधि जितेका हुन् । समग्रमा उनले दोस्रोपटक ग्रान्डस्लाम उपाधि उचाले । यस वर्ष फ्रेन्च ओपनमा पनि जेभरेभ नै च्याम्पियन भएका थिए । योसँगै जेभरेभले समग्रमा २६ उपाधि जितेका छन् । उनी सन् १९८९ पछि युएस ओपन जित्ने पहिलो जर्मनी खेलाडीसमेत बनेका छन् ।
फाइनल जितेपछि २९ वर्षीय जेभरेभ केही समय कोर्टमै उभिइरहे । सेल्टरले गल्ती गरेपछि जेभरेभ जित आफ्नो पक्षमा लेखाउन सफल भएका थिए । त्यसैले पनि उनी उपलब्धि हासिल गरेकोमा अच्चम्मित थिए । जितपछि उनी केही समय कोर्टमै उभिइरहे । लामो समयपछि आर्थर ऐस मैदानमा उपस्थित दर्शकले ठुलो स्वरमा उनको नाममा समर्थन गरिहेका थिए । त्यसपछि उनले हात उठाएर समर्थकले खुसियाली मनाइरहँदा आफ्नो पनि साथ दिए । उनले ऐतिहासिक जितको खुसियाली निकै लामो समयसम्म मनाएका थिए ।
जेभरेभका लागि यो उपाधि किन पनि महत्वपूर्ण थियो भनेर ६ वर्षअघि फर्कनुपर्छ । २०२० मा उनको सपना टुटेको थियो । युएस ओपनकै फाइनलमा उनी डोमिनिक थिमसँग पराजित भएका थिए । दुई सेट त जितेका थिए । तर, त्यसपछिका बाँकी सेट उनको पक्षमा रहेन । त्यसैले पनि यसपटक उनलाई यो उपलब्धि हासिल गर्नु नै थियो । कुनै पनि हालतमा गुमाउनु थिएन ।
प्रतिस्पर्धात्मक फाइनल भिडन्त
यसपटकसमेत बेस सेल्टनको पुनरागमनले जेभरेभलाई अत्याएको थियो । पुरानै फाइनल स्मरण गराएको थियो । जेभरेभले सुरुका दुई सेट जितेका थिए । तर, सेल्टनले तेस्रो सेट सात–पाँचले आफ्नो नाममा गराए । तर, जेभरेभले चौथो सेटमा आफूलाई सम्हाल्दै कुनै चमत्कार हुन दिएनन् ।
दोस्रो तथा आठौँ वरीयता प्राप्त गरेको बेन सेल्टन अमेरिकी टेनिसमा इतिहास रच्ने मनसायमा थिए । उनी सन् २००३ मा एन्डी रोडिकपछि ग्रान्डस्लाम एकल उपाधि जित्ने अमेरिकी खेलाडी बन्ने लक्ष्यमा थिए ।
तर, एलेक्जेन्डरले उनको सपना पूरा हुन दिएन । २३ वर्षीय बेन सेल्टनले सुरुवात त राम्रो गरेका थिए । तर, त्यति सफल हुन सकेनन् । तेस्रो सेटमा सेल्टनले सानदार प्रदर्शन गरे । तर, पनि उनको केही लागेन ।
चौथो सेटमा जेभरेभले कुनै गल्ती दोहोर्याएनन् । आक्रामक खेल प्रदर्शन गरे । बेन सेल्टनको सर्भिसमा दबाब बनाएका थिए । उनलाई कुनै पनि समय दबाब बनाउनैदिएनन् । सेल्टनले लगातार गल्ती गरे । त्यसको फाइदा एलेक्जेन्डर जेभरेभले उठाएका थिए ।
