संयुक्त राष्ट्रसंघीय बाल कोष (युनिसेफ) ले पूर्वी डेमोक्रेटिक रिपब्लिक अफ कंगो (डिआरसी) मा द्वन्द्वका कारण बालबालिकामाथि यौनहिंसाका घटना डरलाग्दो रूपमा बढिरहेको जनाएको छ । सन् २०२५ मा भएका तीव्र द्वन्द्वको समयमा औसतमा हरेक आधा घन्टामा एक बालबालिका यौनहिंसाको सिकार भएको रिपोर्ट गरिएको युनिसेफले जनाएको छ ।
गत वर्ष हजारौँ यौनहिंसासम्बन्धी घटना संकलन गरिएका छन्, जसमा ३५ देखि ४५ प्रतिशत पीडित बालबालिका रहेको युनिसेफले भनेको छ । ‘हामी छुट्टाछुट्टै घटनाको अनुसन्धान गरिरहेका छैनौँ । अहिले त्यहाँ भइरहेका घटना गम्भीर मानव अधिकार संकट हो । कतिपय पीडित निकै साना बालबालिका हुन्,’ युनिसेफका प्रवक्ता जेम्स एल्डरले भने, ‘यौनहिंसालाई युद्धको हतियार र त्रास सिर्जना गर्ने माध्यमको रूपमा प्रयोग गरिएको देखिन्छ ।
यसले परिवार र समुदायमा गहिरो असर पारिरहेको छ ।’उनले अझै धेरै घटना डर, लाज वा असुरक्षाका कारण रिपोर्ट नभएको हुन सक्ने भन्दै अवस्था भयावह हुन सक्ने चेतावनीसमेत दिए ।
