दक्षिण एसियाली देश बंगलादेशमा अज्ञात आक्रमणकारीले एक हिन्दु व्यापारीको निर्मम हत्या गरेको छ । राष्ट्रिय संसदीय चुनावको मतदान हुनुभन्दा दुई दिनअघि हिन्दु व्यापारीको हत्या भएको हो । यो घटना बंगलादेशको मयमनसिंह जिल्लामा भएको हो, जहाँ अर्का हिन्दु पुरुष दिपु चन्द्र दासलाई पनि कुटपिट गरी जलाइएको थियो । पीडित ६२ वर्षीय सुषेन चन्द्र सरकार एक सामान्य चामल व्यापारी थिए ।
प्रहरीका अनुसार सोमबार राति ११ बजे बजारको चौबाटोमा उनको हत्या भएको थियो । अज्ञात आक्रमणकारीले सरकारलाई धारिलो हतियार प्रहारपछि पसलभित्रै छाडेर सटर बन्द गरेका थिए । हत्यापछि पसलबाट लाखौँ रुपैयाँ पनि लुटिएको थियो । परिवारले खोजी गर्दा उनलाई पसलभित्र रगतले लतपतिएको अवस्थामा फेला पारेको प्रहरीले जनाएको छ । उनलाई तत्काल मैमनसिंह मेडिकल कलेज अस्पताल लगिएको थियो, जहाँ चिकित्सकले मृत घोषित गरेका थिए ।
पीडितका छोरा सुजन सरकारका अनुसार हत्याराले बुबाको हत्या गरेपछि पसलबाट पैसा चोरेका थिए । ‘हामी लामो समयदेखि चामलको व्यवसाय गर्दै आएका छौँ । हामीसँग कसैको कुनै दुस्मनी थिएन । बुबाको निर्मम हत्या गरेपछि अपराधीहरूले पसलबाट लाखौँ रुपैयाँ चोरेका थिए,’ उनले भने । सुजनले शव पोस्टमार्टमका लागि अस्पतालको शवगृहमा रहेको र कानुनी कारबाही प्रक्रियामा रहेको बताए । दोषीलाई चाँडै पहिचान गरी सजाय दिन माग गरे ।
हिन्दुविरुद्ध बढ्दो हिंसा
बंगलादेशमा बिहीबार राष्ट्रिय चुनाव हुँदै गर्दा मुहम्मद युनुसको नेतृत्वमा रहेको अन्तरिम प्रशासनको नेतृत्वमा रहेको देशको हिन्दु अल्पसंख्यकको बिग्रँदो अवस्थाप्रति अन्तर्राष्ट्रिय चासो बढ्दै गएको छ । मानव अधिकारकर्मीले चेतावनी दिएका छन् कि अगस्ट २०२४ को राजनीतिक संक्रमणपछि हिन्दुहरूको निरन्तर हिंसा, धम्की र जबर्जस्ती विस्थापन तीव्र भएको छ, जसले चुनावअघि अल्पसंख्यकको सुरक्षा र लोकतान्त्रिक विश्वसनीयतामाथि गम्भीर प्रश्न उठाएको छ ।
बंगलादेशले अगस्ट २०२४ देखि अल्पसंख्यकमाथि हजारौँ आक्रमण देखेको छ, जसमा हत्या, आगजनी, मन्दिर अपवित्र पार्ने र जग्गा कब्जा गर्नेजस्ता घटना समावेश छन् । अन्तर्राष्ट्रिय धार्मिक स्वतन्त्रतासम्बन्धी अमेरिकी आयोगलगायत अन्तर्राष्ट्रिय अनुगमन निकायले २०२५ भरि हिन्दु समुदायविरुद्ध धम्की र हिंसामा निरन्तर वृद्धि भएको रिपोर्ट गरेका छन् । चुनावको पूर्वसन्ध्यामा भएका हिंसाले देशमा थप अस्थिरता बढेको छ ।
यसैबिच भारतले बंगलादेशलाई देशमा भएका साम्प्रदायिक घटनालाई दृढतापूर्वक सम्बोधन गर्न आह्वान गरेको छ । ‘हामी अतिवादीद्वारा अल्पसंख्यक र उनीहरूको घर तथा व्यवसायमाथि बारम्बार आक्रमण भइरहेको देखिरहेका छौँ,’ विदेश मन्त्रालयका प्रवक्ता रणधीर जयसवालले भने । विगत एक वर्षदेखि दुई देशबिचको सम्बन्ध अझ चिसिएको छ, विशेषगरी २०२४ मा भारतविरोधी प्रदर्शनकारी नेता उस्मान हादीको हत्यापछि । उक्त घटनापछि गत वर्षको अन्त्यतिर बंगलादेशमा भारतविरुद्ध विरोध प्रदर्शन तीव्र भए । भारतले बंगलादेशको अन्तरिम सरकारको अधीनमा हिन्दु अल्पसंख्यकमाथि दुव्र्यवहार गरिएको आरोप पनि लगाएको छ ।
गत डिसेम्बरमा इस्लाम धर्मविरुद्ध अपमानजनक टिप्पणी गरेको आरोपमा देशको भालुका क्षेत्रमा एक हिन्दु बंगलादेशी पुरुषलाई कुटपिट गरी हत्या गरिएको थियो । हादीको मृत्युपछि व्यापक विरोध प्रदर्शनबिच उक्त घटना भएको थियो ।
