राष्ट्रिय खेलकुद परिषद् (राखेप)ले एन्फामार्फत दशरथ रंगशालाको सम्पूर्ण विवरण एसियन फुटबल महासंघ (एएफसी)लाई उपलब्ध गराएको छ । एएफसीले फिफा विश्वकप २०२६ को छनोट खेल दशरथ रंगशालामा गर्न मैदानमाथि प्रश्न उठाएपछि राखेपले कागजपत्र उपलब्ध गराएको हो ।
राखेपका सदस्यसचिव घिसिङको उपस्थितिमा राखेपअन्तर्गत पूर्वाधार निर्माण तथा मर्मत शाखाका प्रमुख राजु श्रेष्ठले एन्फाका प्रमुख कार्यकारी अधिकृत इन्द्रमान तुलाधरलाई विवरण हस्तान्तरण गरेका हुन् ।
राखेपबाट सबै विवरण प्राप्त भएपछि एन्फाले शुक्रबारै एएफसीमा पत्र पठाएको छ । फिफा विश्वकप २०२६ छनोट र एसियन कप २०२७ छनोटअन्तर्गत युएर्ईविरुद्ध २४ जेठमा हुने खेलका लागि एएफसीका प्रतिनिधिले १९ र २१ वैशाखमा रंगशालाको अनुगमन गरेका थिए । त्यसक्रममा फ्लड लाइट, दुबो, माटोको सतह नमिलेको र सुरक्षा जोखिम रहेको भन्दै एएफसीले प्रश्न उठाएको थियो ।
यसअघि एएफसीले एन्फालाई खेल खेलाउन दशरथ रंगशाला उपयुक्त हुने आधारसहित चारबुँदे विवरण माग गरेको थियो । गत चैतदेखि रंगशालाको सबै रेखदेख राखेपले गर्दै आएको छ । बिहीबार मात्रै संसदीय समितिमा दशरथ रंगशालाबारे प्रश्न उठ्दा राखेपका सदस्यसचिव घिसिङले यसै साताभित्र विवरण उपलब्ध गराउने प्रतिबद्धता दिएका थिए ।
आगामी दिनदेखि अन्तर्राष्ट्रिय महासंघहरूको पूर्वाधार मापदण्ड राखेपलाई समयमै उपलब्ध गराउन घिसिङले एन्फाको ध्यानाकर्षण गराएका छन् । यसअघि मैदान समयमै तयार नहुँदा नेपालले बहराइनसँगको घरेलु खेल बहराइनमै खेल्नुपरेको थियो । ८ चैतमा भएको पहिलो लेगमा नेपाल ५–० र १३ चैतमा भएको दोस्रो लेगमा ३–० ले पराजित भएको थियो ।
समूह ‘एच’मा रहेको नेपाल लगातार चौथो हार व्यहोर्दै अमेरिका, क्यानडा र मेक्सिकोमा आयोजना हुने विश्वकपबाट बाहिरिसकेको छ । नेपालले चार खेलबाट कुनै अंक जोड्न सकेको छैन । युएई, बहराइन र यमन रहेको समूहमा नेपाल पुछारमा छ ।
