- वि.सं २o८१ बैशाख २३ आइतबार
एमाले महाधिवेशनमा २२७९ जना महाधिवेशन प्रतिनिधि सहभागी हुने भएका छन् । एमालेले प्रतिनिधि संख्या दुई हजारमा सीमित गर्ने भने पनि पार्टी सदस्य संख्या थप भएकाले प्रतिनिधिको संख्या बढेको नेता योगेश भट्टराईले जानकारी दिए ।
उनका अनुसार पदेन दुई सय ३८, अहिलेसम्म निर्वाचित १८ सय ८९ जना (केही जिल्लाको आउन बाँकी), निर्वाचित हुन बाँकी ६८ जना हुनेछन् । त्यसको पाँच प्रतिशत मनोनीत हुनेछन् । मनोनीत सदस्यको सूची मंगलबारको स्थायी कमिटीमा पेस भएको छ । निर्णय हुन भने बाँकी रहेको छ ।
महाधिवेशनले १५ जना पदाधिकारी र २२५ जना केन्द्रीय सदस्य निर्वाचित गर्नेछ । यस्तै, अनुशासन आयोगका अध्यक्षसहित १५ र लेखा आयोगका अध्यक्षसहित १५ जना पनि निर्वाचित गर्नेछ ।
बैठकले महाधिवेशनको बन्दसत्र सञ्चालनको निम्ति ११ सदस्यीय अध्यक्षमण्डल गठन गरेको छ । अध्यक्षमण्डलमा अध्यक्ष केपी ओली, उपाध्यक्षहरू युवराज ज्ञवाली, अष्टलक्ष्मी शाक्य, भीम रावल, महासचिव ईश्वर पोखरेल र स्थायी कमिटी सदस्यहरू सुवास नेम्वाङ, रामबहादुुर थापा, टोपबहादुर रायमाझी, छविलाल विश्वकर्मा, केन्द्रीय कमिटी सदस्यहरू लालबाबु पण्डित र गोमा देवकोटा रहेका छन् ।
एमाले महाधिवेशन १० मंसिरमा चितवनमा सुरु हुँदै छ ।
