डढेलो र धुलोका कारण काठमाडौं उपत्यकासहित मुख्य सहरको वायु प्रदूषण खराब स्थितिमा पुगेका वेला तुवाँलोले आकाश छोपेको छ । दिनभर टन्टलापुर घाम लागिरहेकामा बिहीबार र शुक्रबार काठमाडौंमा हल्का बादल लागेपछि तुवाँलो पनि बढेको हो ।
बादलका कारण वायुमण्डलको तल्लो तहमा धुलो, धुवाँका कण थिग्रिएपछि साँझपख तुवाँलो निकै बढेको हो । हावा पनि नचल्ने र पानी पनि नपरेका कारण पछिल्लोपटक धुलोधुवाँका कण मान्छेको उचाइको तहमा समेत रहने गरी बहिरहेको छ, जसकारण श्वासप्रश्वाससम्बन्धी बिरामी पनि बढेका छन् ।
पिएम २.५ माइक्रोनभन्दा मसिना धुलोधुवाँका कण, जुन सीधै नाकमुखबाट श्वासनलीमा गएर रगतमा समेत मिसिन्छ, त्यसको मात्रा काठमाडौंमा प्रतिघण्टा दुई सय माइक्रोग्राम प्रतिघनमिटर पुगिरहेको छ । जुन मानव स्वास्थ्यका लागि अस्वस्थकर हो ।