अष्ट्रियाको राजधानी भियनामा स्थानीय समयअनुसार सोमबार भएका विभिन्न आतंकवादी आक्रमणमा पाँचजनाको मृत्यु भएको प्रहरीले पुष्टि गरेको छ । घटनामा कम्तीमा १५ जना गम्भीर घाइते भएका थिए । विभिन्न स्थानमा भएका आतंककारी हमलामा इस्लामिक समूहको संलग्नता रहेको प्रारम्भिक अनुसन्धानपछि भियनाको प्रहरीले ट्विटरमार्फत उल्लेख गरेको छ । 

आतंककारी आक्रमणपछि प्रहरीले गरेको प्रतिरोधका क्रममा कम्तीमा एकजना आक्रमणकारीको मृत्यु भएको छ । आक्रमणकारीले  शरीरमा राखेको ‘आत्मघाती विस्फाेटक पदार्थ’ नक्कली भएको प्रहरीले पुष्टि गरेको छ । प्रहरीले आक्रमणकारीको घरसहित अन्य संगग्न मतियारहरूको आक्रमणका समय खिचिएको भिडियोका आधारमा खोजी गरिरहेको बताएको छ । आक्रमणको विश्वव्यापी रूपमा निन्दा भएको छ ।