- वि.सं २o८१ बैशाख २३ आइतबार
जिल्ला प्रहरी परिसर काठमाडौंले पठाओ र इनड्राइभका नाममा अफलाइन राइड गर्ने ८३ चालकलाई कारबाही गरेको छ।
काठमाडौंका विभिन्न स्थानबाट अनधिकृत तवरले सर्वसाधारणलाई ओसारपसार गर्ने ‘अफलाइन राइड ट्रिप’ क्रियाकलापमा संलग्नलाई नियन्त्रणमा लिई आवश्यक कारबाही गरेको छ।
जिल्ला प्रहरी परिसर काठमाडौंका सूचना अधिकारी प्रहरी उपरीक्षक कुमोद ढुंगेलले आज जारी गरेको प्रेस विज्ञप्तिमा विगतका केही आपराधिक घटनामा यस्ता सवारीचालकको संलग्नता देखिएको र सुरक्षा संवेदनशीलताकाे दृष्टिबाट सदैव जोखिम सिर्जना हुने भएको कारणले अफलाइन राइड सेयर नगर्नेतर्फ सचेत रहन अनुरोध गरिएको छ।
