सुदूरपश्चिम प्रदेश सभाले मंगलबार पारित गरेको बजेटलाई लिएर सत्तारूढ एमालेभित्र विवाद चर्किएको छ । बजेटप्रति असन्तुष्टि जनाउँदै प्रदेश सभा सदस्य वीरबहादुर थापाले पदबाट राजीनामा दिएका छन् भने बजेट पारित गर्न बसेको प्रदेश सभा बैठक बहिष्कार गरेका आफ्ना दुई सांसदलाई एमाले संसदीय दलले स्पष्टीकरण सोधेको छ ।
थापाले सभामुख भीमबहादुर भण्डारीलाई मंगलबार नै राजीनामापत्र बुझाएका हुन् । उनको राजीनामाबारे सभामुखले निर्णय गरिसकेका छैनन् । राजीनामा बुझाका थापा बजेट पारित गर्न मंगलबार बसेको प्रदेश सभा बैठकमा उपस्थित भएनन् । सभामुख भण्डारीले प्रदेश सभा सदस्य थापाले राजीनामा बुझाएको, तर यसबारे निर्णय भइनसकेको बताए । स्रोतका अनुसार थापाको राजीनामा तत्काल ‘होल्ड’ गर्न एमाले नेतृत्व तहबाटै सभामुखलाई आग्रह गरिएको छ ।
दलको ह्विप उल्लंघन गर्दै बजेट पारित गर्ने बैठक बहिष्कार गरेका थापा र अर्का सांसद धर्मराज पाठकलाई एमाले संसदीय दलले स्पष्टीकरण सोधेको छ । उनीहरूलाई ४८ घण्टाभित्र जवाफ पठाउन भनिएको छ । पाठकको सामाजिक विकास समिति सभापतिको जिम्मेवारी पनि खोसिएको छ । पाठकलाई समिति सभापतिबाट फिर्ता बोलाउने निर्णय सभामुखलाई समेत जानकारी गराइएको एमाले संसदीय दलका सचेतक निर्मला साउदले बताइन् ।
प्रदेश सभा बैठकमा उपस्थित नभएको विषयमा स्पष्टीकरण सोधिएको उल्लेख गर्दै साउदले जवाफ आएपछि थप कारबाहीबारे दलको बैठकमा छलफल हुने बताइन् । एमालेले मंगलबार बसेको प्रदेश सभा बैठकमा अनिवार्य उपस्थित भएर बजेटको पक्षमा मतदान गर्न ह्विप जारी गरेको थियो । ह्विप जारी गर्न बसेको दलको बैठकमा पाठक अनुपस्थित रहेको र थापा उपस्थित भए पनि हाजिरी नगरेको बताइएको छ ।
थापाले जनताका लागि, आफ्नो क्षेत्रका लागि केही गर्न नसकेको, ‘पावरवाला’को मात्र काम हुने सरकारबाट कुनै अपेक्षा पनि नरहेकाले जनताको करबाट सेवासुविधा लिइरहनु उपयुक्त नठानेकाले पदबाट राजीनामा दिएको उल्लेख गरेका छन् । प्रदेश सरकारका गतिविधिले प्रदेश संरचनाप्रति पनि नकारात्मक भावना फैलिएको उनले राजीनामापत्रमा लेखेका छन् ।
स्रोतका अनुसार थापाले बजेट पारित गर्न नहुने र बजेटमाथिको छलफलका क्रममा सबै सांसदले भाग लिन पाउनुपर्ने माग संसदीय दलमा राखेका थिए । तर, दलका नेता राजेन्द्रसिंह रावलले उनलाई बजेटमाथिको छलफलमा दलका तर्फबाट बोल्न नाम दिएनन् । नेता रावल आफैँले बजेटबारे सदनमा धारणा राखेका थिए ।
कञ्चनपुर १ (१) बाट प्रत्यक्ष निर्वाचित थापा यसअघि प्रदेशका भूमि व्यवस्था, कृषि तथा सहकारी मन्त्री थिए । आर्थिक मामिलामन्त्री चक्र मल्लले गत आइतबार प्रस्तुत गरेको ३७ अर्ब ७० करोड ३९ लाख ६६ हजारको बजेट प्रदेश सभाले मंगलबार पारित गरेको थियो । मल्ल एमालेबाटै मन्त्री बनेका हुन् । बजेटलाई लिएर सत्तापक्षकै सांसदले चर्को असन्तुष्ट जनाएपछि आगामी मंसिर पहिलो सातासम्म पूरक बजेट ल्याउने गरी बजेट पारित गरिएको थियो ।
