‘अनुशासन नै राष्ट्र सेवाको मूल जग हो’ भन्ने आदर्श बोकेको राष्ट्रिय सेवा दल (एनसिसी) प्रति अछामका युवा विद्यार्थीहरुको व्यापक आर्कषण देखिएको छ । यो पटक एनसिसीमा आवेदन दिनेको संख्या थपिएपछि आर्कषण बढेको देखिएको हो ।
नेपाली सेनाको गोरख बक्स गण मंगलसेन ब्यारेकका सेनानी लक्ष्मण थापाका अनुसार एनसिसीका लागी आवश्यक ६० जनामा १६१ बढीले आवेदन दिएका छन् । यो संख्या विगत वर्षको तुलनामा धेरै हो ।
जिल्लाको ढकारी स्थित गुरुकुल मावि र मेल्लेखको दुर्गादेवी मावि यो वर्ष राष्ट्रिय सेवा दलका लागी छनौट भएका थिए । यी दुबै विद्यालयमागरी १६१ बढी विद्यार्थीले आवेदन दिएका हुन् । त्यसमापनि छात्रभन्दा छात्राको संख्या उत्साहजनक देखिएको सेनानी थापाले बताए ।
आवेदन दिएकाहरुको उचाइ, तौल, छाती, आँखा, कान, दाँत र रक्तचाप लगायत शारीरिक जाँच र स्वास्थ्य परीक्षणपछि गुरुकुलबाट १५ छात्र र १५ छात्रा गरी ३० र दुर्गादेवीबाट पनि १५ छात्र र १५ छात्रा गरी ३० जनालाई छनौटगरी प्रशिक्षणको तयारी थालिएको छ । त्यसका लागी गोरख बक्स गणबाट जमदार गणेश कुमार तामाङ र अमल्दारहरु दिलकुमारी चौधरी, निरजंग बम, जगत रोकाय र निर्मला कुमारी दुवाल प्रशिक्षकका रुपमा खटिएका छन् ।
उनीहरुले ७९ दिनसम्म तालिम दिएपछि क्याडेटहरुलाई थप २१ दिने विशेष आवासीय प्रशिक्षणका लागी पश्चिम तालिम शिक्षालय कोहलपुर पठाइने छ । त्यहाँ उनीहरुलाई चरित्र, नेतृत्व गुणस्तर, खेलकुद, निःस्वार्थ सेवाको आदर्श भावनाको विकासका लागी जुनियर डिभिजन समूहको तालिम दिइने सेनानी थापाले बताए ।
अन्त्यमा १०० दिनको प्रशिक्षणपश्चात् क्याडेटहरूले प्रतिष्ठित पास आउट परेड प्रदर्शन गर्नेछन् । पिओपी कार्यक्रम पूरा भएपछि उनीहरूलाई योग्यता अनुसारको दज्र्यानी चिह्न प्रदान गरिनेछ । यसले अभिभावक र समुदायमा पनि सकारात्मक सन्देश विस्तार गर्ने विस्वास लिइएको सेनानी थापाले बताए । ‘विद्यार्थीको बानी व्यवहार तथा आचरणमा परिवर्तन देखेपछि अहिले विभिन्न विद्यालयमा यो तालिम माग बढेको छ,’ भर्ना छनौट परीक्षणका क्रममा उनले भने, ‘अभिभावकहरू पनि सेवादलको तालिमप्रति सकारात्मक देखिनु भएको छ ।’
गुरुकुल मावि व्यवस्थापन समितिका अध्यक्ष धनबहादुर बुढाले यो तालिमले विद्यार्थीहरुलाई अनुभव आदानप्रदान गर्ने, अनुशासित, इमानदार र जिम्मेवार नागरिकका रूपमा रूपान्तरण गर्ने बताए । त्यसका लागी अभिभावकहरुको सकारात्मक भूमिका हुनुपर्ने उनको भनाई छ ।
प्रधानाध्यापक भिमबहादुर शाहीले विद्यार्थीको शारीरिक र मानसिक क्षमता अभिवृद्धि गरी अनुशासित, बफादार र देशप्रति समर्पित युवा सिर्जना गर्न एनसिसीले मद्दत गर्ने विस्वास व्यक्त गरे । दुर्गादेवी माविका प्रधानाध्यापक कृष्णबहादुर बिकले यो तालिमले सैद्धान्तिक र व्यावहारिक ज्ञानको समेत विकास हुने भएकाले आर्कषण बढेको बताए।
नेपाली सेनाले गत वर्ष अछामको तुर्माखाँद स्थित भैरव मावि र त्यसअघि साँफेबगरको जनकल्याण मावि, मंगलसेनको शोडषा मावि, विनायकको विद्या मन्दिर मावि र मंगलसेनको गंगा माविका विद्यार्थीलाई एनसिसी तालिम दिएको थियो ।
