गैरआवासीय नेपाली संघ (एनआरएन)को नयाँ नेतृत्व छनोट गर्ने उद्देश्यले आह्वान गरेको १२औँ महाधिवेशन आजबाट काठमाडौंमा सुरु हुने भएको छ । बिहान नौ बजे उद्घाटनसत्र र त्यसपछि २ चैतसम्म नयाँ नेतृत्व छनोटको कार्यतालिका रहेको संघले जनाएको छ ।
नेतृत्व चयनका लागि विश्वभर रहेका सदस्यबाट चार हजार दुई सय ८६ प्रतिनिधि छनोट भएका छन् । उम्मेदवारलाई भौतिक र अनलाइन दुवै प्रणालीबाट भोटिङ गर्ने व्यवस्था गरिएको छ ।
संघको महाधिवेशन गर्न परराष्ट्रमन्त्री बालानन्द शर्माको अध्यक्षतामा एक उच्चस्तरीय आयोजक समिति गठन भएको थियो । सोही समितिको सक्रियतामा आयोजित महाधिवेशनमा गैरआवासीय नेपालीसम्बन्धी ऐन, संविधानप्रदत्त आर्थिक, सामाजिक र सांस्कृतिक अधिकार, गैरआवासीय नेपालीको संयुक्त लगानी, पर्यटन, स्वास्थ्य, ज्ञान, सिप र प्रविधि हस्तान्तरण, महिला, युवा तथा दोस्रो पुस्तालाई नेपालसँग जोड्नेलगायतका विविध सत्रमा छलफल हुने कार्यक्रमसमेत राखिएको छ । २३ वर्षअघि स्थापना भएको संघको सञ्जाल ९२ देशमा विस्तार भएको छ ।
