गगन थापालाई बाबुराम भट्टराईको बधाई, भने– पुराना दलहरूको पुनर्संरचना प्रक्रिया सुरु भयो

पूर्वप्रधानमन्त्री डा. बाबुराम भट्टराईले नेपाली कांग्रेसको विशेष महाधिवेशनबाट गगन थापालाई सभापतिमा निर्वाचित हुन सफल भएकोमा बधाई दिएका छन्। उनले यसलाई पुराना राजनीतिक दलहरूमा समयानुकूल सुधार र पुनर्संरचनाको सुरुवात भएको महत्त्वपूर्ण कदमको रूपमा मूल्यांकन गरेका छन्।

भट्टराईले भने, ‘पुरानो लोकतान्त्रिक पार्टी नेपाली कांग्रेसबाट सुरु भएको समयानुकूल पुनर्संरचना सफलतापूर्वक सम्पन्न भएकोमा नवनिर्वाचित सभापति गगनकुमार थापा र टोलीलाई हार्दिक बधाई तथा शुभकामना ।’

उनले नयाँ तथा वैकल्पिक राजनीतिक शक्तिहरू र पुनर्संरचित दलहरूबिच स्वस्थ प्रतिस्पर्धा र सहकार्यले संघीय लोकतान्त्रिक गणतन्त्र बलियो बन्ने विश्वास व्यक्त गरे। भट्टराईले थपे, ‘यसले अन्य दलहरूको अग्रगामी पुनर्संरचनामा पनि योगदान पुर्याओस् र देशमा लोकतन्त्रको आधार अझ मजबुत बनोस्।’