नेकपा एमालेको अध्यक्षमा पराजित भएका ईश्वर पोखरेलले निर्वाचित सबैलाई बधाई तथा शुभकामना दिँदै एमालेको अभियानमा आफू रहिरहने प्रतिक्रिया दिएका छन्।
महाधिवेशनको दौरान आफूहरूले उठाएका मुद्दाहरू बहस र छलफलले नयाँ स्तरमा निरन्तरता पाउने पोखरेलको अपेक्षा छ।
‘महाधिवेशनको दौरानमा उठाएका मुद्दाहरू– जनताको बहुदलीय जनवादको प्रकाशमा पार्टीमा सामूहिक नेतृत्व, विधि र पद्धतिअनुसार पार्टी सञ्चालन, पार्टीलाई सही र लोकतान्त्रिक तरिकाले सञ्चालन गर्न ‘नियन्त्रण र सन्तुलन’को सिद्धान्तको पालन आदि महत्त्वपूर्ण विषयहरूमा बहस र छलफलले नयाँ स्तरमा निरन्तरता पाउने कुरामा विश्वास व्यक्त गर्दछु,’ उनले भनेका छन्।
आफू पराजित भए पनि देशभक्तिपूर्ण आन्दोलन, लोकतान्त्रिक आन्दोलन र समाजवादको आधार निर्माण गर्ने एमालेको अभियानमा सहभागिता र संलग्नता अटुट रूपमा रहिरहने पोखरेलले बताएका छन्।
