काठमाडौं/ रास्वपा नेता विपिनकुमार आचार्यले बाहिरबाट सामान्य र खुसी देखिने मानिसभित्र पनि गहिरो पीडा, चिन्ता, निराशा र मानसिक संघर्ष लुकेको हुन सक्ने उल्लेख गरेका छन्। मानिसले आफ्नो जीवनमा गर्ने सबैभन्दा उत्कृष्ट अभिनय नै ‘म ठिक छु’ भन्नु भएको उनको भावनात्मक अभिव्यक्ति छ।
विश्व मानसिक स्वास्थ्य दिवसको अवसरमा उनले आफ्ना डर, चिन्ता र निराशासँग भित्रभित्रै लडिरहेका मानिसलाई पनि आत्मीय साथ, भरोसा र बुझिदिने मनको आवश्यकता पर्ने बताएका छन्। रातभर आफ्नै विचारसँग संघर्ष गरेर बिहान मुस्कानका साथ संसारसामु प्रस्तुत हुने मानिसहरूको साहसलाई उनले मौन योद्धाको संज्ञा दिएका छन्।
मानसिक स्वास्थ्यको कठिन अवस्थाबाट गुज्रिरहेका व्यक्तिहरूलाई सहानुभूति मात्र नभई साथ र भरोसाको हात आवश्यक रहेको सन्देश दिँदै आचार्यले हरेक मौन संघर्ष गरिरहेको मनले जीवनको उज्यालोतर्फ फर्कने अवसर पाउनुपर्ने भावना व्यक्त गरेका छन्।
विश्व मानसिक स्वास्थ्य दिवसका अवसरमा उनले भत्किएका मनहरूले थामिदिने भरपर्दो हात पाऊन्, हरेक उकुसमुकुसको अन्त्य शान्त सासमा होस् र जीवनले सधैँ जितिरहोस् भन्ने कामना गरेका छन्।
आचार्यको सन्देशले मानसिक स्वास्थ्य समस्यालाई लुकाएर बस्नुभन्दा एकअर्काको भावना बुझ्ने, सुन्ने र आवश्यक परेको वेला साथ दिने संस्कृतिको महत्त्वलाई स्मरण गराएको छ।
उनको सन्देशको सार छ- बाहिरबाट ‘म ठिक छु’ भन्ने हरेक मानिसभित्रको पीडा बुझ्न सक्ने संवेदनशील मन बनौँ। कहिलेकाहीँ कसैको जीवनमा आशा जगाउन ठुलो कुरा होइन, साथमा छु भन्ने एउटा वाक्य नै पर्याप्त हुन सक्छ।
