सरकारले आसन्न २१ फागुनका लागि छट्याएको बजेट थोरै भएको गुनासो गर्दै आएको निर्वाचन आयोगले एक अर्ब ९० करोड थप्न माग गरेको छ । आयोगले सात अर्ब ८१ करोड मागेकोमा सरकारले चुनावका लागि चार अर्ब ९६ करोड रुपैयाँ विनियोजन गरेको छ ।
आवश्यकताअनुसार बजेट निकासा नभए निर्वाचन व्यवस्थापनमा समस्या हुने आयोगको गुनासो छ । आयोग पदाधिकारीले बजेट थप्न भन्दै गृहमन्त्री ओमप्रकाश अर्याल र अर्थमन्त्री रामेश्वर खनालसँग छलफल गरेका छन् । अर्थमन्त्री खनालले सरकारले निर्वाचनका लागि बजेट अभाव हुन नदिने आश्वासन दिएका छन् ।
सोमबार पनि अर्थमन्त्री खनाललाई बोलाएर आयोग पदाधिकारीले बजेट पर्याप्त नभएको गुनासो गरेका छन् । त्यसअघि उनीहरूले गृहमन्त्री अर्याललाई बोलाएर निर्वाचनमा खटिने कर्मचारीलाई खाजा र अतिरिक्त भत्तासमेत दिन नसकिने र मतदाता शिक्षाको बजेट पाँच गुणाले कटौती हुँदा निर्वाचनमा असर पर्न सक्ने भन्दै ध्यानाकर्षण गराएका थिए ।
कार्यवाहक प्रमुख आयुक्त रामप्रसाद भण्डारीले बजेटको कमी हुन नदिने प्रतिबद्धता अर्थमन्त्रीबाट आएको बताए । ‘सरकारले निर्वाचनका लागि चाहिने बजेट कुनै वेला पनि पठाउँछ, तपार्इंहरू अगाडि बढ्नुस् भनेर अर्थमन्त्रीले प्रस्ट भन्नुभयो । ढुक्क त पहिले नै थियौँ, अझ प्रस्ट भयो,’ उनले भने । भेटमा आयुक्तहरूले निर्वाचन तयारीको विषयमा मन्त्री खनाललाई जानकारी गराएका थिए । मन्त्री खनालले बजेटमा पुनर्विचार हुने भन्दै ढुक्कका साथ निर्वाचनमा लाग्न आग्रह गरेका थिए । आयोगले कम्तीमा एक अर्ब ९० करोड बजेट थपिदिनुपर्ने माग गरेको छ ।
समानुपातिक निर्वाचन कार्यालय स्थापना
निर्वाचन आयोगले २१ फागुनमा तोकिएको प्रतिनिधिसभा निर्वाचनका लागि समानुपातिक निर्वाचन कार्यालय स्थापना गरेको छ । आयोगका सचिव निर्वाचन अधिकृत रहने कार्यालयको उद्घाटन कार्यवाहक प्रमुख आयुक्त रामप्रसाद भण्डारीले सोमबार गरेका छन् । कार्यालयले समानुपातिक निर्वाचन प्रणालीबमोजिम स्वीकृत निर्वाचन कार्यक्रमलाई अगाडि बढाउने सहसचिव यज्ञ भट्टराईले बताए । जसमा समानुपातिक निर्वाचन प्रणालीमा भाग लिन सूचना प्रकाशन गर्ने, दलहरूबाट निवेदन माग्ने, निवेदन जाँचबुझसहित स्वीकृत गरेर निर्णय गर्ने, दललाई चुनाव चिह्न निर्धारण गर्ने, बन्दी सूची लिने, प्रकाशन गर्ने कार्यक्रम छ ।
निर्वाचनको काममा राष्ट्रिय सभाले आवश्यक सहयोग गर्छ : दाहाल
राष्ट्रिय सभा अध्यक्ष नारायण दाहालले २१ फागुनमा हुने प्रतिनिधिसभा निर्वाचन सफल गराउन माथिल्लो सदनले सघाउने प्रतिबद्धता जनाएका छन् । सोमबार कार्यवाहक प्रमुख निर्वाचन आयुक्त रामप्रसाद भण्डारीसँगको भेटमा दाहालले निर्वाचन आयोगको सक्रियता र पहलकदमीले निर्वाचनको राम्रो माहोल बनेको भन्दै निर्वाचन सफल बनाउन आयोगको काम प्रशंसनीय रहेको बताए ।
