धेरै बक्यौता हुने उद्योगीको सूचीमा तेस्रो स्थानमा रहेको शिवम् सिमेन्टले विद्युत् प्राधिकरणलाई पहिलो किस्ताबराबरको रकम भुक्तानी गरेको छ । ६६ करोड ८९ लाख बक्यौतालाई २८ किस्तामा विभाजन गरी शिवम् सिमेन्टले दुई करोड ३८ लाखबराबरको पहिलो किस्ता बुझाएको हो । हेटौँडामा सञ्चालित शिवम् सिमेन्टले विगतमा बक्यौता तिर्न आनाकानी गर्दै आए पनि सोमबार पहिलो किस्ता बुझाएको प्राधिकरणले जनाएको छ । प्राधिकरणले तोकेको समयमा बक्यौता नतिरेपछि ४ कात्तिकमा उद्योगको लाइन काटिएको थियो ।
यो उद्योग धेरै बक्यौता हुनेमा तेस्रो नम्बरमा छ । पहिलो नम्बरमा रहेको जगदम्बा स्टिलको एक अर्ब ६० करोड र दोस्रो नम्बरमा रहेको रिलायन्स स्पिनिङ मिल्स ७५ करोड ३७ लाख बक्यौता छ । रिलायन्स स्पिनिङ मिल्सले पनि बक्यौता तिर्न सुरु गरिसकेको छ । जगदम्बा स्टिलमा भने लाइन काटिएकै अवस्था छ । यस्तै, हिमाल आइरन एन्ड स्टिलले पनि आइतबार बक्यौताको पहिलो किस्ता तिरेको छ । हिमाल आइरन एन्ड स्टिलको १३ करोड ६५ लाख रुपैयाँ बक्यौता छ । त्यसपछि उद्योगमा लाइन जोडिएको छ ।
यद्यपि, उद्योगीहरूले यसलाई किस्ताका रूपमा नभएर धरौटीका रूपमा भुक्तानी गरेको बताएका छन् । गत साता प्रधानमन्त्री कार्यालयमा उद्योगीले धरौटीका रूपमा पहिलो किस्ता तिरेपछि लाइन जोड्ने र न्यायिक प्रक्रिया अघि बढाउने सहमति भएको थियो । त्यसपछि केही उद्योगीले धरौटी भन्दै पहिलो किस्ता तिरेका छन् । तर, प्राधिकरणले भने किस्ताकै रूपमा बक्यौता बुझेको बताउँदै आएको छ ।
यसमा द्विविधा भएपछि गत शुक्रबार प्रधानमन्त्री तथा मन्त्रिपरिषद्को कार्यालयले सहमतिका आधारमा बक्यौता असुल गर्न सहजीकरणका लागि ऊर्जा मन्त्रालयलाई पत्र पठाएको छ ।
प्राधिकरणमा भने हालसम्म त्यस्तो पत्र आइनपुगेको कार्यकारी निर्देशक मनोज सिलवालले बताए । ‘हामीलाई तालुक निकायबाट कुनै लिखित पत्र आएको छैन । लिखित पत्र आएपछि त्यहीअनुसार निर्णय गर्न सकिन्छ होला,’ उनले भने, ‘अहिले किस्ताकै रूपमा बक्यौता असुल गरेका छौँ । पछि न्यायिक प्रक्रियामा हुने निर्णयका आधारमा त्यसलाई समायोजन गर्न सकिन्छ ।’
योसँगै लाइन काटेपछि किस्ता तिर्न सुरु गर्ने उद्योगको संख्या १४ पुगेको छ । यीसहित किस्ता तिर्न सुरु गर्ने उद्योग संख्या भने १७ पुगेको छ । तीन उद्योगले लाइन नकाट्दै पहिलो किस्ता तिरेका थिए । बक्यौता नतिर्ने कुल २५ उद्योगमा लाइन काटिएको थियो । अहिले ११ उद्योगमा लाइन काटिएकै अवस्था छ ।
बक्यौता नतिर्ने ३४ मध्ये तीन उद्योगले मात्रै तोकिएको म्यादभित्र पहिलो किस्ता तिरेका थिए । त्यसपछि प्राधिकरणले अदालतबाट अन्तरिम आदेश पाएका ६ बाहेक २५ उद्योगमा ४ र ७ कात्तिकमा गरेर लाइन काट्यो । लाइन काटिएपछि १४ उद्योग बक्यौता तिर्ने प्रक्रियामा आएका छन् भने अब ११ उद्योगमा लाइन नै काटिएको अवस्था छ । अदालतबाट अन्तरिम आदेश पाएका कारण कारबाहीबाट बचेका ६ उद्योगसहित अब १७ उद्योग बक्यौता तिर्ने प्रक्रियामा आउन बाँकी छ ।
