काठमाडौंमा जारी नेपाल प्रिमियर लिग (एनपिएल)मा विराटनगर किंग्सले तेस्रो हार बेहोरेको छ। शनिबार भएको एनपिएलको १३ औं खेलमा विराटनगर कर्णाली याक्ससँग ७ रनले पराजित भयो। १३४ रनको लक्ष्य पनि उसले पुरा गर्न सकेन।
चार खेलमध्ये तीनमा पराजित भएपछि विराटनगरको प्लेअफ सम्भावना कमजोर बनेको छ। अंक तालिकामा २ अंकसहित विराटनगर सातौं स्थानमा छ ।
टिमको नतिजासँगै विराटनगरका कप्तान सन्दीप लामिछानेको व्यक्तिगत प्रदर्शन पनि राम्रो हुन सकेको छैन । एनपिएलमा उनको बलिङ चल्न सकेको छैन । चार खेलमा सन्दीपले १ विकेट मात्र लिएका छन् ।
शनिबारको खेलमा सन्दीपले विकेट त लिन सकेनन् धेरै रन समेत खर्चिए। चार ओभरमा उनले ३६ रन दिएका थिए।
यसअघि लुम्बिनी लायन्सविरुद्धको खेलमा एक विकेट लिएर २६ रन खर्चिएका सन्दीपले त्यसअघि सुदुरपश्चिम र जनकपुरविरुद्धको खेलमा विकेटविहिन बनेका थिए। जनकपुरविरुद्ध ३० रन तथा सुदुरपश्चिमविरुद्धको खेलमा ३१ रन खर्चिएका थिए।
ब्याटीङतर्फ चार खेलमा सन्दीपले २२ रन बनाएका छन्।
