पाँचपटकको च्याम्पियन भारतलाई नेपालले सन् २०२२ मा दशरथ रंगशालामै १–० ले हराएको थियो
नेपाली राष्ट्रिय महिला फुटबल टोलीकी कप्तान अञ्जिला तुम्बापो सुब्बाले भारतलाई फेरि घरमै हराउने योजना रहेको बताएकी छिन् । साफ महिला च्याम्पियनसिप २०२४ को सेमिफाइनलमा आइतबार पाँचपटकको च्याम्पियन भारत र घरेलु टोली नेपालबिच प्रतिस्पर्धा हुँदै छ । दशरथ रंगशालामा हुने खेलमा नेपाल लगातार भारतलाई सेमिफाइनलमा हराउने योजनामा छ । ‘सबै खेलाडी मानसिक रूपमा तयार छन् । हाम्रो लक्ष्य भारतलाई फेरि घरमै हराउने हो,’ कप्तान अञ्जिलाले भद्रकालीस्थित नेपाली सेनाको मुख्यालयमा भएको पूर्वसन्ध्याको अभ्यासपछि भनिन् । ‘सावित्रा भण्डारी, रेनुका नगरकोटेलगायत अनुभवी खेलाडी सेमिफाइनलमा हुनेछन् । युवा टोली पनि उच्च लयमा हुँदा टोली मजबुत बनेको छ ।’
सन् २०२२ मा दशरथ रंगशालामै भएको सेमिफाइनलमा नेपालले भारतलाई १–० ले हराउँदै फाइलनमा स्थान बनाएको थियो । रश्मिकुमारी घिसिङको निर्णायक गोलमा नेपालले भारतलाई हराएको हो । तर, फाइनलमा बंगलादेशसँग ३–१ ले पराजित हुँदा नेपाल पुनः उपविजेतामै सीमित बनेको थियो ।
भुटानविरुद्ध खेल्दा एसिएल गुमाएका दीपा शाही र हिराकुमारी भुजेलको अभाव भने नेपाली टिममा खड्किनेछ । उनीहरू नौ महिना मैदानबाहिर हुनेछन् । दुई खेलमा विश्राम लिएका रक्षक पूजा राना र समीक्षा घिमिरे टोलीमा कमब्याक हुन सक्छन् । भारतसँग खेल्नुअघि सेनाको मैदानमा प्रशिक्षक राजेन्द्र तामाङले दुवैलाई अभ्यास गराएका थिए । प्रशिक्षक तामाङले घरेलु समर्थकमाझ भारतलाई पुनः हराउने रणनीति रहेको जानकारी गराए । ‘हाम्रो मुख्य खेलाडी सावित्रालाई उनीहरूले रोक्नेछन् । त्यसको फाइदा नयाँ खेलाडीले लिनुपर्छ,’ उनले भने, ‘घरेलु समर्थकमाझ भारतलाई हराउन खेल्छौँ ।’
नेपालविरुद्ध भारतकी मिडफिल्डर अञ्जु तामाङ पनि चोटका कारण उपलब्ध हुनेछैनन् । गोलकिपर पान्थोई चानु नयाँ हुँदा नेपालले त्यसको फाइदा लिन सक्ने प्रशिक्षक तामाङको विश्वास छ । प्रशिक्षक सन्तोषकुमार कश्यपले घरेलु समर्थकमाझ नेपालसँग खेल्न तयार भएको प्रतिक्रिया दिएका छन् ।
यसअघि भारत समूह ‘ए’बाट उपविजेता हुँदै सेमिफाइनलमा प्रवेश गरेको हो । पहिलो खेलमा पाकिस्तानलाई ५–२ ले हराएको भारत दोस्रो खेलमा साबिक विजेता बंगलादेशसँग ३–१ ले पराजित भएको थियो । यता, नेपाल समूह ‘बी’को विजेताका रूपमा अन्तिम चारमा प्रवेश गर्यो । तीन खेल खेल्दा नेपाललाई मात्रै कुनै पनि टोलीले गोल गर्न सकेका छैनन् । नेपालले तीन खेलमा १७ गोल गर्दा सात अंक जोडेको थियो ।
