गैरआवासीय नेपाली संघको निर्वाचन नजिकिँदै गर्दा चुनावी उम्मेद्वारहरूको दौडधुप बाक्लिएको छ । संघको आगामी नेतृत्वका लागि पाँचजना दौडमा देखिएका छन् । यद्यपि, त्रिपक्षीय भिडन्त हुने सम्भावना भने अधिक रहेको छ । ३० असोजदेखि २ कात्तिकसम्म हुने अधिवेशनमा आगामी नेतृत्वका लागि वर्तमान कार्यकारी अध्यक्ष डा. बद्री केसी, वर्तमान अध्यक्ष रविना थापा, उपाध्यक्षद्वय राजेन्द्रकुमार शर्मा (आरके शर्मा) र महेश श्रेष्ठ एवं उपमहासचिव विनय अधिकारी आकांक्षी देखिएका छन् । पाँचैजना अध्यक्ष बन्न दौडधुप गरिरहेका छन् ।
वर्तमान उपमहासचिव विनय अधिकारीले काठमाडौमा एक औपचारिक कार्यक्रमको आयोजना गरी उम्मेदवारीको घोषणा गरेका हुन् । त्यस्तै, महेश श्रेष्ठले बिहीबार एक कार्यक्रमको आयोजना गरी औपचारिकमा नै उम्मेदवारीको घोषणा गर्ने भएका छन् । अन्य तीनजनाले अध्यक्षका प्रत्याशीले भने आन्तरिक तयारी थालेका छन् ।
चुनावी मैदानमा उत्रिएका अध्यक्षका दाबेदारहरू राजनीतिक कृपाका लागि पनि उत्तिकै दौडधुप गरेका छन् । अध्यक्षका दाबेदार महेश श्रेष्ठ र रविना थापा नेपाली कांग्रेसनिकट भनेर चिनिएका छन् । मध्यपूर्वको नेतृत्व गर्दै अध्यक्षको दाबीदारी गरेका आरके शर्मा माओवादीनिकट मानिएका छन् । त्यसैगरी, डा. बद्री केसी एमाले समर्थित भनेर चिनिएका छन् । तर, पाँचैजना आकांक्षीले आफूलाई कुनै एक दलको मात्रै समर्थन नरहेको दाबी गरेका छन् । उनीहरूले दलहरूको समर्थन लिनका लागि राजनीतिक दौडधुपसमेत नगरेको जिकिर गरे ।
अध्यक्षका प्रत्याशी शर्माले आफूलाई सबै राजनीतिक दलको समर्थन रहेको बताए । अर्का प्रत्याशी श्रेष्ठले पनि नेपाली कांग्रेसले मात्रै नभई अन्य दलले पनि आफूलाई समर्थन गर्ने दाबी गरे । अध्यक्ष प्रत्याशी विनय अधिकारीले भने संघभित्रको प्रवेश गरेको राजनीतिलाई हटाउन आफूले उम्मेदवारी दिएको बताएका छन् ।
राजनीतिले छवि धुमिलिँदै
एनआरएन पूर्ण रूपमा सामाजिक संस्था भनेर प्रचार गरिए तापनि निर्वाचनमा भने चरम राजनीति हुँदै आएको छ । यसअघिको १०औँ महाधिवेशन संघभित्र राजनीति हाबी हुँदा तोकिएको समयमा निर्वाचन नै हुन सकेन । राजनीतिक कारणले संघ फुटेर दुई टुक्रा भएको थियो । तोकिएको अवधिभन्दा ६ महिनापछि मात्रै अध्यक्षका प्रत्याशीबीच सहमति भएको थियो । सहमतिबाट संघकै इतिहासमा तीनजना अध्यक्ष चुनिएका थिए । एकजनाले ६ महिना कार्यकारीको भूमिका निर्वाह गर्ने गरी तीनजना अध्यक्षबीच सहमति भएको थियो । यसले एनआरएनएको छवि नै धुमिल बनाएको थियो ।
महाधिवेशनका लागि चार हजार २२१ प्रतिनिधि छनोट
गैरआवासीय नेपाली संघको ११औँ महाधिवेशनका ८० वटा मुलुकबाट चार हजार दुई सय २१ जना प्रतिनिधि छनोट भएका छन् । संघमा यसपटक ९० प्रतिशत प्रतिनिधि अन्तर्राष्ट्रिय समन्वय समिति तथा राष्ट्रिय समन्वय समिति रहेर काम गरेकाबाट छनोट गरिएको छ ।
प्रतिनिधिका लागि संघ आवेदन माग गरेको थियो । प्राप्त आवेदनबाट छनोट गरिनेछ । यसअघि भने ६५ प्रतिशत मात्रै यसरी छनोट गरिने प्रावधान थियो । त्यस्तै, १० प्रतिशत भने वर्तमान राष्ट्रिय समन्वय परिषद्ले छनोट गरी पठाउनेछ । परिषद्ले अन्तर्राष्ट्रिय समन्वय परिषद्लाई प्रतिनिधि छनोट गरी पठाएको छ । यसरी पठाइएको प्रतिनिधिको सूची निर्वाचन कमिटीलाई दिइने संघका महासचिव हेमराज शर्माले बताए ।
संघका अनुसार अफ्रिकाबाट १२८ जना प्रतिनिधि छनोट हुनेछन् । अमेरिकाबाट ४३७, एसिया प्यासिफिकबाट ७२२, युरोपबाट १६९१, मध्यपूर्वबाट ९४० र ओसियानाबाट ३०३ प्रतिनिधि छानिनेछन् । प्रतिनिधि छनोट गर्दा एक हजार पञ्जीकृत सदस्य रहेका राष्ट्रिय समन्वय परिषद् (एनसिसी) बाट १०० जना महाधिवेशन प्रतिनिधि छनोट हुनेछन् । दुई हजार पञ्जीकृत सदस्य भएको एनसिसीबाट भने १२५ जना महाधिवेशन प्रतिनिधि छनोट हुनेछन् । ५ प्रतिशत अर्थात् ६ जना थप महाधिवेशन प्रतिनिधि संख्या थपिने संघले जनाएको छ । तीन हजार पञ्जीकृत सदस्य हुने एनसिसीबाट १३८ जना महाधिवेशन प्रतिनिधि छनोट हुनेछन् । यसमा ६ प्रतिशत अर्थात् आठजना प्रतिनिधि थप हुनेछन् । चार हजार पञ्जीकृत सदस्य भएको एनसिसीबाट १४६ जना महाधिवेशन प्रतिनिधि छनोट हुनेछन् । थप ७ प्रतिशत अर्थात् १० जना प्रतिनिधि थप हुनेछन् ।
त्यस्तै, पाँच हजार पञ्जीकृत सदस्य भएको एनसिसीबाट १५२ जना महाधिवेशन प्रतिनिधि छनोट हुनेछन् । जसमा १० प्रतिशत अर्थात् १५ जना प्रतिनिधि छनोट हुनेछन् । १० हजार पञ्जीकृत सदस्य भएको एनसिसीबाट १७१ जना प्रतिनिधि छनोट हुनेछन् । २० प्रतिशत अर्थात् ३४ जना प्रतिनिधि थप गर्न सकिनेछ । त्यस्तै, २० हजार पञ्जीकृत सदस्य हुने एनसिसीबाट १८९ महाधिवेशन प्रतिनिधि छनोट हुनेछन् । २५ प्रतिशत अर्थात् ४७ प्रतिशत प्रतिनिधि छनोट हुनेछ । ३० हजार पञ्जीकृत सदस्य हुने एनसिसीबाट १९९ महाधिवेशन प्रतिनिधि छनोट हुनेछन् भने २५ प्रतिशत अर्थात् ५० जना प्रतिनिधि थप हुनेछन् ।
