हुम्ला चखेली गाउँपालिका- ५ को उच्च लेकाली क्षेत्रमा पाइने बहुमूल्य जडीबुटीको अवैध चोरी–निकासी बढेको छ।
सम्बन्धित निकायको उदासीनताका कारण लेकाली भेगबाट मुगु, जुम्ला र हुम्ला जिल्लाका केही गाउँपालिकाबाट अवैध रूपमा जडीबुटी चोरी निकासी बढेको हो ।
चखेली गाउँपालिका–५ को नेप्का गाउँका विभिन्न क्षेत्र टाँके, माडिभिटा, फुने, निलिगलगायतका स्थानबाट जडीबुटी चोरी भएको स्थानीयले बताए ।
बहुमूल्य जडीबुटी चोरी हुन थालेपछि सिगो गाउँका स्थानीय पालो गर्दै रक्षक बस्न थालेका छन् ।
मुगु र जुम्ला जिल्लाबाट ठेकेदारले कुल्ली लगाएर बहुमूल्य जडीबुटी जटामसी, कटुकीकाे चोरी निकासी गरेको स्थानीयको आरोप छ ।
विभिन्न स्थानमा जडीबुटी चोरी निकासीलाई सिंगो गाउँका स्थानीय मिलेर लखेटेको वडाध्क्षय भैरव तामाङले जानकारी दिए ।
नेप्का गाउँका विभिन्न ठाउँबाट सयौँ क्विन्टल कटुकी चोरी भएपछि गाउँका ६६ घरधुरी मिलेर विभिन्न स्थानमा जडीबुटी जोगाउन वन रक्षक बस्नुपर्ने बाध्यता रहेको वडाध्यक्ष तामाङले बताए ।