कामचलाउ सरकारले अध्यादेशमार्फत पूर्ण बजेट ल्याएपछि विपक्षी गठबन्धनका शीर्ष नेताहरू छलफलमा जुटेका छन् । कांग्रेस सभापति शेरबहादुर देउवाको निवास बुढानीलकण्ठमा विपक्षी दलका शीर्ष नेताहरूको बैठक सुरु भएको छ ।
बैठकमा विपक्षी गठबन्धनका तर्फबाट सर्वोच्च अदालतमा परेको रिटमाथि आजैदेखि बहस हुने विषयमा समेत छलफल हुनेछ । समसामयिक राजनीतिक विषयमा साझा धारणा बनाउन शीर्ष नेताहरूको बैठक बसिरहेको एक नेताले जानकारी दिए ।
बैठकमा कांग्रेसबाट सभापति देउवा, वरिष्ठ नेता रामचन्द्र पौडेल, नेता कृष्णप्रसाद सिटौला, महामन्त्री पूर्णबहादुर खड्का, सचेतक पुष्पा भुसाल र राष्ट्रिय सभाका सदस्य राधेश्याम अधिकारी सहभागी छन् ।
नेकपा माओवादी केन्द्रबाट अध्यक्ष पुष्पकमल दाहाल प्रचण्ड, कृष्णबहादुर महरा र देव गुरुङ छन् । यस्तै, एमालेकाे खनाल-नेपाल पक्षबाट नेता माधवकुमार नेपाल र भीम रावल तथा जनता समाजवादी पार्टीबाट अध्यक्ष उपेन्द्र यादव, संघीय परिषद् अध्यक्ष डा. बाबुराम भट्टराई र राजेन्द्र श्रेष्ठ तथा राष्ट्रिय जनमोर्चाकी उपाध्यक्ष दुर्गा पौडेल सहभागी छन् ।
