ट्रम्प प्रगतिशीलका लागि खराब हुन्, बाइडेन पनि कम खराब छैनन्, यो चुनावमा मजस्ता मतदाताका लागि कुनै उम्मेदवार छैनन्
अमेरिकामा पुनः राष्ट्रपतीय चुनावको मौसम सुरु भएको छ । र, प्रगतिशील विचारकअघि पुनः एकपटक अन्योल आइपरेको छ । एकातर्फ अति प्रतिगामी डोनाल्ड ट्रम्प छन् र उनीविरुद्ध उठेका अर्का उम्मेदवार बाइडेन पनि कर्पाेरेट समर्थक राजनीतिज्ञ हुन् । अघिल्लोपटक ट्रम्प र हिलारी क्लिन्टन चुनाव लडिरहँदा पनि यही अवस्था थियो । प्रख्यात अफ्रिकी–अमेरिकी दार्शनिक कार्नेल वेस्ट आगामी चुनावमा बाइडेनलाई भोट हाल्ने सोचमा छन् । उनी आफ्ना मतलाई
‘फासीवादविरोधी’ मत बताउँछन् । बाइडेन सत्तामा आए भने आफूले जीवनभर बोकेको आदर्शविरुद्ध काम गर्छन् भन्ने थाहा हुँदाहँुदै पनि वेस्ट ट्रम्पजस्तो खराब उम्मेदवारलाई हराउन उनको समर्थनको विकल्प नरहेको धारणा राख्छन् ।
विश्वप्रसिद्ध भाषाशास्त्री तथा राजनीतिक अभियन्ता नोम चोम्स्कीको पनि यस्तै विचार छ । उनले सार्वजनिक रूपमा ‘जो बाइडेनलाई मत हालेर जिताउन र पछि उनका कर्मविरुद्ध संघर्ष गर्न’ आह्वान गरिरहेका छन् । क्रान्तिकारी विचारक तथा अभियन्ता एन्गेला डेभिस पनि अहिले बाइडेनलाई समर्थन गर्न आवश्यक रहेको बताउँछिन् । ट्रम्पको निर्लज्ज नश्लवाद र आतंकविरुद्ध अन्य समय बाइडेनको समर्थन नगर्ने प्रगतिशील विचारक पनि उनको पक्षमा उभिएका छन् । उनीहरूमा ट्रम्पलाई हटाएर पछि बाइडेनमाथि दबाब राख्न सकिन्छ भन्ने विश्वास देखिन्छ ।
तर म भने माथिका प्रख्यात प्रगतिशील विचारकसँग फरक मत राख्दै खुला रूपमा घोषणा गर्छु– म बाइडेनलाई मत हाल्दिनँ । तर, यसो भनेर माथिका विचारकभन्दा म बढी सिद्धान्तनिष्ठ छु भनेर देखाउन खोजेको भने होइन । मलाई मेरो कर्म धेरैले पछ्याए भने ट्रम्पले अर्को कार्यकाल जित्छन् भन्ने चिन्ता नभएको होइन । तर पनि म कहिले पनि बाइडेनलाई मत हाल्नेछैन । बाइडेन पनि एक परिचित नश्लवादी हुन् र उनी स्वघोषित जायोनिस्ट (यहुदी राज्यका पक्षधर) हुन् । बाइडेन ती उम्मेदवार हुन्, जसले एकजना बिडिएस समर्थक प्यालेस्टाइनी अभियन्ता लिन्डा सारसोरलाई समेत आफ्नो टिममा स्विकार्न सकेनन् । त्यसअतिरिक्त बाइडेन महिलालाई हेय ठान्छन् र विगतमा उनले इराक युद्धको पनि समर्थन गरेका थिए ।
वर्नी स्यान्डर्स उनीभन्दा निकै उत्कृष्ट उम्मेदवार हुने थिए, तर डेमोक्रेटिक पार्टीले लगतार दुईपटक उनको उम्मेदवारीको सम्भावना अन्त्य गरिदियो । बाइडेनलाई मत दिनु भनेको यस्तो राजनीतिक संस्कृतिको आधारलाई समर्थन गर्नु हो, जसले बाइडेन तथा ट्रम्पजस्ता नेता निर्माण गर्छ । अहिले हामीले ट्रम्प र बाइडेनमध्येबाट एकजना चुन्यौँ भने अर्कोपटक हामीसामु इभान्का ट्रम्प र चेल्सी क्लिन्टन विकल्प आइपर्नेछ । यो कुचक्रलाई अन्त्य गर्ने हो भने हामीले यो राजनीतिक संस्कृतिविरुद्ध दिगो र सम्झौतारहित वैचारिक प्रहार गर्नुपर्छ । बाराक ओबामाको भाषणपछि म बाइडेनलाई मत नहाल्ने पक्का निर्णयमा पुगेको हुँ।
त्यस वेलासम्म मैले बाइडेनलाई दिइने मत खासमा उनको समर्थन नभएर ट्रम्पविरुद्धको मत हो भन्ने सोच्थेँ । तर, जब ओबामाले पोडियममा उभिएर भावुक हुँदै बाइडेनलाई मत हाल्न आग्रह गरे, मेरो मन बदलियो । ओबामाजस्तो ढोंगी र कुराले ठिक्क पार्ने मान्छे बाइडेनको पक्षमा उभिएपछि पनि बाइडेनलाई समर्थन गरिरहँदा मलाई घिन लाग्यो ।
प्रत्येकपटक जब ओबामा सार्वजनिक स्थानमा भावुक हुन्छन्, तब मलाई उनले अमेरिकी बन्दुक हिंसाका सिकार बालबालिकाका लागि रोएको सम्झन्छु । तर लगत्तै कार्यालय फर्केर उनी इजरायललाई थप हतियार पठाउने सहमति गर्थे । ती हतियारले धेरै प्यालेस्टाइनी बालबालिकाको हत्या भएको छ । त्यस्तै उनले साउदी अरब र युएईलाई बेचेको हतियारबाट धेरै यमनी बालबालिकाको ज्यान लिएको छ । प्यालेस्टाइनी र यमनी बालबालिका, बालबालिका होइनन् ? यी कायर व्यक्ति कसरी निर्लज्ज रूपमा यमन, प्यालेस्टाइन, अफगानिस्तान र अन्यत्रका बालबालिकाप्रति यति क्रूर र कठोर हुन्छन् र अमेरिकी बालबालिकाप्रति ख्याल गरेको नाटक गर्छन् ?
प्यालेस्टाइनीको सबालमा बाइडेन ओबामाभन्दा पनि घातक हुनेछन् । त्यसैले बाइडेनलाई समर्थन गर्नु भनेको उनले विगतमा इजरायललाई प्यालेस्टाइनीको हत्यामा सहयोग गरेको काममा समर्थन गर्नु हुन्छ । उनी चुनिएमा त्यस कार्य थप निरन्तर चल्ने निश्चित छ । ट्रम्प प्रगतिशीलका लागि दानव हुन् तर बाइडेन पनि कम छैनन् । यो चुनावमा मजस्ता मतदाताका लागि कुनै उम्मेदवार छैनन् । चार वर्षअघिको चुनावमा मैले कम खराबलाई चुन्नुपर्छ भनेको थिएँ । तर, आज आएर मेरो यो सोच बदलिएको छ । हामीहरूले दुवै खराबलाई हराउने निरन्तरको आलोचनात्मक वैचारिक मार्ग अवलम्बन गर्नु उपयुक्त हुन्छ ।
(डवासी कोलम्बिया विश्वविद्यालयका प्राध्यापक हुन्)
अल जजिराबाट
