नेपालबाट गैरकानुनी ढंगले सुनचाँदीका गहना विदेश लैजान खोज्ने कार्गोका दुई सञ्चालक पक्राउ परेका २४ घण्टा नबित्दै छुटेका छन् । त्रिभुवन अन्तर्राष्ट्रिय विमानस्थलस्थित भन्सार कार्यालयबाट धरौटी रकम बुझाएर उनीहरू छुटेका हुन् । उनीहरूलाई त्रिभुवन अन्तर्राष्ट्रिय विमानस्थल सुरक्षा कार्यालयबाट खटिएका प्रहरी टोलीले १६ असारमा पक्राउ गरेको थियो । उनीहरूले कपडाजन्य सामग्रीको अवरणमा सुन र चाँदीको गहना पैठारी गर्ने कोसिस गरेका थिए ।
हवाई सुरक्षा प्रणालीमा यसलाई अत्यन्तै संवेदनशील मानिन्छ । तर, घटनामा संलग्न दुई अभियुक्तलाई भन्सार कार्यालयले सामान्य घटना मानी धरौटीमा छाडेको छ । त्रिभुवन विमानस्थल भन्सार कार्यालयका प्रवक्ता धु्रवराज विश्वकर्माले सुन र चाँदीको गहना पैठारीमा संलग्न दुईजना पक्राउ परेको भोलिपल्ट धरौटी रकम तिरेर छुटेको बताए ।
वैध रूपमा खरिद गरिएका सुन र चाँदीका गहना विदेश पैठारी गर्न कानुनले कुनै अवरोध गरेको छैन । तर, झापास्थित युनिक कार्गो र गौचरनस्थित एपेक्स लजिस्टिकले अवैध बाटो प्रयोग गरी ६७ लाख ३४ हजार ३५० रुपैयाँ मूल्यको सुनका र १४ लाख ३८ हजार ४३ रुपैयाँ मूल्यको चाँदीका गहना पैठारी गर्ने कोसिस गरेका थिए । प्रहरीले युनिकका सञ्चालक ३४ वर्षीय रामप्रसाद दाहाल र एपेक्सका सञ्चालक ४६ वर्षीय यज्ञराज सुवेदीलाई पक्राउ गरेको थियो । तर, उनीहरूलाई एकमुस्ट ८० लाख रुपैयाँ धरौटी लिएर भन्सारले छाडेको छ ।
त्रिभुवन अन्तर्राष्ट्रिय विमानस्थल सुरक्षा कार्यालयका प्रमुख एसएसपी वसन्त रजौरेले वैध बाटो हुँदाहुँदै अवैध बाटो प्रयोग गरी सुन र चाँदीका गहना पैठारी गर्न खोज्नु रहस्यमय रहेको बताए । ‘बिल भएका जुनसुकै धातुका गहना विदेश लैजान कानुनले रोकेको छैन । तर, उनीहरूले अवैध बाटो प्रयोग गरी सुनचाँदीको गहना विदेश लैजान खोजेको देखियो,’ उनले भने ।
विमानस्थल सुरक्षा कार्यालयका प्रमुख एसएसपी वसन्त रजौरे भन्छन्– ‘बिल भएका जुनसुकै धातुका गहना विदेश लैजान कानुनले रोकेको छैन । तर, उनीहरूले अवैध बाटो प्रयोग गरी सुनचाँदीको गहना विदेश लैजान खोजेको देखियो । हवाई सुरक्षामा यसलाई अत्यन्तै गम्भीर रूपमा हेरिन्छ ।
