युएईले भिसा प्रमाणीकरण शुल्कबापत १४ हजार दुई सय रुपैयाँ असुल्न थालेपछि नेपाली श्रमिकहरू अन्य देशतर्फ मोडिन थालेका छन् । उक्त शुल्क बुझाउँदासमेत भिसा पाउने ग्यारेन्टी नभएपछि तीन महिनायता सबैभन्दा बढी साउदी अरब जाने श्रमिकका लागि श्रम स्वीकृति जारी भएको छ ।
युएईले आधिकारिक रूपमा भने भिसा प्रमाणीकरण शुल्क लिएको जानकारी सरकारी निकायलाई गराएको छैन । तर, नेपालस्थित युएईको दूतावासले श्रमिकको प्रहरी रिपोर्टमा छाप नलगाएको आवेदन रद्द गर्दै आएको छ । श्रमिकको प्रहरी रिपोर्टमा छाप लगाउन दूतावासलाई १४ हजार २ सय रुपैयाँ बुझाएको भौचर आवश्यक पर्ने म्यानपावर व्यवसायीहरूले बताएका छन् । भिसा प्रमाणीकरणका लागि १४ हजार दुई सय बुझाउनुपर्ने व्यवस्थाप्रति व्यवसायीहरूले आपत्ति जनाएका छन् । उनीहरूले श्रम मन्त्रालय र परराष्ट्र मन्त्रालयमार्फत भिसाशुल्क खारेजीका लागि पहल लिन आग्रह गरे पनि सुनुवाइ भएको छैन ।
जेन–जी आन्दोलनपछि युइईले नेपाली श्रमिक आपूर्तिमा कडाइ गरेको छ । २३ र २४ भदौको जेन–जी आन्दोलनलगत्तै युएईले नेपाली कामदार लिन बन्द गरेको थियो । तर, व्यवसायी र सरकारको दबाबपछि प्रहरी प्रतिवेदन लिएर कामदार लिने गरी केही खुकुलो नीति लिएको छ ।
वैदेशिक रोजगार व्यवसायी संघका महासचिव महेशकुमार बस्नेतले भिसा प्रमाणीकरण शुल्क हटाउन पहलकदमी नलिए युएईको रोजगारी संकटमा पर्ने बताए । ‘२५ पुसमा संघ अध्यक्ष भुवनसिंह गुरुङ नेतृत्वको टोलीले परराष्ट्रमन्त्री बालानन्द शर्मालाई ध्यानाकर्षणपत्र बुझाएको थियो । त्यसक्रममा मन्त्री शर्माले कूटनीतिक माध्यमबाट समस्या समाधानको पहल लिने आश्वासन दिएका थिए । श्रम मन्त्रालयका प्रवक्ता पीताम्बर घिमिरेले भने भिसाशुल्क लिनेबारे युएईबाट आधिकारिक केही जानकारी नआएको बताए ।
१८ मंसिरदेखि प्रमाणीकरण शुल्क लागू
जेन–जी आन्दोलनलगत्तै नेपाली कामदार आपूर्ति रोकेको युएईले व्यवसायी र सरकारको दबाबमा पुलिस रिपोर्टका आधारमा लैजाने गरी केही खुकुलो बनाएको थियो । १८ मंसिरदेखि भने नेपाली कामदार आपूर्तिमा थप कडाइ गर्ने गरी १४ हजार पाँच सय रुपैयाँ भिसाशुल्क लिन थाल्यो । केही दिनमा तीन सय रुपैयाँ घटाएर प्रतिश्रमिक १४ हजार दुई सय रुपैयाँ भिसा प्रमाणीकरण शुल्क लिइरहेको वैदेशिक रोजगार व्यवसायी संघका महासचिव महेशकुमार बस्नेतले जानकारी दिए । ‘अहिले युएईले गरिरहेको अभ्यास अन्य देशले पनि लागू गर्न खोजे भने नेपाली श्रमिकमाथि ठुलो आर्थिक भार पर्छ । त्यो समय आउनुअगावै समस्या समाधान हुनुपर्छ भनेर सरकारलाई बारम्बार ध्यानाकर्षण गराइरहेका छौँ,’ उनले भने ।
युएई जाने श्रमिक ह्वात्तै घटे
वैदेशिक रोजगार विभागका अनुसार चालू आर्थिक वर्ष ०८२/८३ साउनमा २३ हजार आठ सय ३४ श्रमिक युएई गएका थिए । भदौमा थप बढेर २५ हजार दुई सय १८ युवाले युएईले श्रम स्वीकृति लिएका थिए । तर, भदौमा भएको जेन–जी आन्दोलनपश्चात् युएईले नेपाली श्रमिक आपूर्तिमा कडाइ गरेकाले असोजदेखि युएई जाने श्रमिको संख्या ओरालो लागेको छ । असोजमा १८ हजार चार सय ४६, कात्तिकमा १३ हजार तीन सय ९९, मंसिरमा नौ हजार तीन सय ८२ र पुसमा नौ हजार पाँच सय १७ ले युएईको श्रम स्वीकृति लिएको विभागको तथ्यांक छ ।
