केही दिनयता गुलरियामा रहेको सामुदायिक वन तथा केराबारीमा दिनहुँ चितुवा देखिन थालेपछि स्थानीय चिन्तित बनेका छन् । निकुञ्जमा बाघको संख्या बढेसँगै यसअघि कहिल्यै नदेखिने स्थानमा चितुवा देखिन थालेको छ । गुलरिया तथा मधुवनसँग सिमाना जोडिएको कर्तनिया वाइल्ड लाइफ सेन्चुरीबाट समेत चितुवा बस्तीमा आउन थालेपछि स्थानीयमा त्रास बढेको हो ।
गुलरिया नगरपालिका–१ का कृष्ण भुसालले चितुवाले गाउँका पशुचौपाया मार्ने गरेको बताए । ‘कहिलेकाहीँ साँझपख नै चितुवासँग जम्काभेट हुन्छ । दिनहुँ चितुवाको गाउँमा आउँदा त्रास बढेको छ । साँझपख र रातको समयमा घरबाहिर आउन पनि समस्या हुने गरेको छ,’ उनले भने ।
भारतको कर्तनिया वल्र्ड लाइभ सेन्चुरी जोडिएको मधुवन नगरपालिका–७ भाटचोकमा गत ३ फागुन साँझ आँगनमा खेलिरहेका दुई वर्षीय बालक रिहान चलाउनेको चितुवाको आक्रमणबाट मृत्यु भएको थियो । गत २५ माघमा मधुवन नगरपालिका–७ गंगाबस्तीकी ५१ वर्षीया जुनाकुमारी लामिछानेको खेतमा काम गरिरहेको अवस्थामा चितुवाको आक्रमणबाट मृत्यु भएको थियो । खेतमा गहुँ काटिरहेको अवस्थामा गुलरिया नगरपालिका–४ का ६५ वर्षीय बिकुलाल थारूलाई २६ चैतमा चितुवाले आक्रमण गरी घाइते बनाएको थियो । गुलरिया नगरपालिका–५ का नौ वर्षीय उमेश चौधरी २० चैतमा चितुवाको आक्रमणमा परी घाइते भएका थिए ।
डिभिजन वन कार्यालय बर्दियाका सूचना अधिकारी रामकुमार चौधरीले चितुवाको गतिविधि बढेसँगैै समाउन पासो थापिएको बताए । ‘चितुवाको आक्रमण बढेपछि विभिन्न स्थानमा सिसिटिभी जडान गरी चितुवाको गतिविधि निहालिरहेका छौँ । चितुवालाई नियन्त्रणमा लिन प्रयास गरिरहे पनि सफल हुन सकेका छैनौँ । पासोमा पार्नेबित्तिकै समुदायमा चितुवाका कारण हुने जोखिम हुन्छ,’ उनले भने ।
