‘नेसनल आइसिटी स्कलरसिप–२०८०’ को आवेदन खुला
कम्प्युटर एसोसिएसन नेपाल महासंघले प्राविधिक शिक्षातर्फ विगत चार वर्षदेखि प्रदान गर्दै आइरहेको छात्रवृत्तिको ‘नेसनल आइसिटी स्कलरसिप–२०८०’ का लागि आवेदन खुला गरेको छ । लर्ड बुद्ध एजुकेसन फाउन्डेसनसँगको सहकार्यमा सुरु गरिएको छात्रवृत्तिमार्फत ४९ जना विद्यार्थीले आंशिक तथा पूर्ण छात्रवृत्ति पाउनेछन् । ‘नेसनल आइसिटी स्कलरसिप–२०८०’ मा प्रत्येक प्रदेशबाट एकजना छात्रालाई पूर्ण छात्रवृत्ति र बाँकी ४२ जनालाई आंशिक छात्रवृत्ति प्रदान गरिनेछ । विगत चार वर्षदेखि सञ्चालित यस छात्रवृति कार्यक्रमअन्तर्गत हालसम्म एक सय १० जना विद्यार्थी अध्ययनरत छन् ।
यो वर्ष पनि फिमेल मेरिट आइसिटी स्कलरसिपमा प्रत्येक प्रदेशबाट चारजनाका दरले २८ जना छात्रालाई छात्रवृत्ति प्रदान गरिनेछ । आइसिटी मेरिट स्कलरसिपअन्तर्गत प्रत्येक प्रदेशबाट तीनजनाका दरले २१ जनालाई छात्रवृत्ति प्रदान गरिनेछ । क्यान महासंघ र लर्ड बुद्ध एजुकेसन फाउन्डेसन कलेजबीच भएको सम्झौताअनुसार ४९ जना विद्यार्थीले दुई करोड ८३ हजार छात्रवृत्ति पाउनेछन् । छात्रवृति प्राप्त विद्यार्थीले मलेसियाको एसिया प्यासेफिक युनिभर्सिटी अफ टेक्नोलाजी एन्ड इन्नोभेसनको सम्बन्धनमा सञ्चालित लर्ड बुद्ध एजुकेसन फाउन्डेसनमा स्नातक तहअन्तर्गत बिएससी आइटीको अध्ययन गर्न पाउनेछन् ।
नेपाल सरकारबाट मान्यताप्राप्त शिक्षण संस्थाबाट प्लस टु वा सोसरह उत्तीर्ण गरेका र कक्षा १० को गणित विषयमा कम्तीमा ५० प्रतिशत अंक ल्याएका विद्यार्थीले आवेदन दिन सक्नेछन् । छात्रवृत्तिका लागि इच्छुक विद्यार्थीले क्यान महासंघको वेबसाइट र लर्ड बुद्ध एजुकेसन फाउन्डेसनको वेबसाइटमार्फत २० भदौभित्र आवेदन दिनुपर्नेछ ।
यो अभियानले कार्यान्वयनको चरणमा रहेको डिजिटल नेपाल फ्रेमवर्कलाई सहयोग पुग्ने क्यान महासंघका अध्यक्ष रणजितकुमार पोदारले बताए । क्यान महासंघसँगको सहकार्यले देशभित्र रहेको डिजिटल–डिभाइड कम गर्न मद्दत पुग्ने र भविष्यमा यस्तै कार्यमा अन्य संस्थालाई पनि सार्वजनिक–निजी साझेदारीका निम्ति प्रोत्साहन मिल्ने लर्ड बुद्ध एजुकेसन फाउन्डेसनका अध्यक्ष इ. पंकज जालानले बताए ।
