गत वैशाखमा स्थानीय तह निर्वाचनको प्रचारप्रसारका वेला दीपक तिमिल्सिनाले गण्डकी गाउँपालिकाको अध्यक्षमा आफू निर्वाचित भए पाँच वर्षसम्म पाउने भत्ता र अन्य सुविधाको सम्पूर्ण रकम सामाजिक कार्यमा लगाउने प्रतिबद्धता जनाएका थिए । 

उनी निर्वाचित पनि भए । र, निर्वाचित भएपछिको पहिलो महिनाको सेवा–सुविधा एक सामुदायिक विद्यालयलाई हस्तान्तरण गरेका छन् । अध्यक्ष तिमिल्सिनाले एक महिनाको अवधिमा सेवा–सुविधाबापत प्राप्त ३६ हजार दुई सय रुपैयाँ ध्याल्चोकस्थित ज्ञान मार्ग माध्यामिक विद्यालयलाई हस्तान्तरण गरेका हुन् । 

ज्ञान मार्ग उनले अध्ययन गरेको विद्यालय हो । रकम हस्तान्तरणको क्रममा उनले जनप्रतिनिधिका रूपमा आफूले पाउने सम्म्पूर्ण सेवा सुविधाको रकम सामाजिक काममा खर्चने प्रतिबद्धता पुनः व्यक्त गरे । विद्यालयका प्रधानाध्यापक डिबी गुरुङले सामाजिक उत्तरदायित्व निर्वाह गरेको भन्दै उनको प्रशंसा गरे ।