- वि.सं २o८१ बैशाख १८ मंगलबार
प्रतिनिधिसभा सदस्य लीलादेवी सिटौलाले देशमा प्रत्यक्ष निर्वाचित कार्यकारी प्रमुखको व्यवस्था हुनुपर्ने बताएकी छिन्। प्रतिनिधिसभाको सोमबारको बैठकमा सांसद सिटौलाले यस्तो माग गरेकी हुन्।
सांसद सिटौलाले संघ र प्रदेशको सांसद संख्या घटाएर सानो बनाउनुपर्ने र पूर्ण समानुपातिक बनाउनुपर्नेसमेत बताइन्। स्थानीय तहलाई प्रदेशको मातहतमा राख्नुपर्ने उनको तर्क छ।
‘म सत्तापक्ष र प्रतिपक्षका नेताहरूलाई आग्रह गर्न चाहन्छु कि अब प्रत्यक्ष कार्यकारीको व्यवस्था गरौँ। प्रत्यक्ष कार्यकारी व्यवस्थाका लागि छलफल गरौँ। स्थानीय निकायलाई प्रदेशमातहत राखौँ। संघ र प्रदेशको जम्बो सांसद घटाएर सानो बनाऔँ। तर, पूर्ण समानुपातिक, समावेशी बनाऔँ। केन्द्रमा पाँच, ६ वटा मन्त्रालय मात्रै राखौँ। विकासे पुँजीलाई केन्द्रीकृत नगरौँ, जनताको घर, आँगनमा पुर्याउन प्रदेशमार्फत काम गरौँ। प्रत्यक्ष कार्यकारीले संविधानविपरीत कार्य गरे संसदको बहुमतले फिर्ता बोलाउन सक्ने व्यवस्था गरौँ,’ उनले भनिन्।
