नेपाल विज्ञान तथा प्रविधि प्रज्ञा प्रतिष्ठान (नास्ट)को विज्ञटोलीले सिसडोल पुगेर कोल्पुखोलाको पानी र लिच्चडको परीक्षण गरेको छ । मंगलबार डा. रवीन्द्र ढकाल, डा. टिष्टा प्रसाईं, डा. सौरभ भट्टराई, अनिता पन्थी र सुनिता श्रेष्ठसहितको विज्ञटोलीले लिच्चड मिसिएको स्थान र लिच्चड मिसिने स्थानभन्दा नौ सय २० मिटर पर गरेर तीन मिटरको फरक–फरक बिन्दुबाट पानीको नमुना संकलन गरेर अध्ययन गरेको काठमाडौं महानगरपालिकाका मेयर बालेन्द्र साहले जानकारी दिएका छन् ।
स्रोतबाट एक किलोमिटर परसम्मको पानीमा पनि प्रदूषणको मात्रा उच्च देखिएको र यसबाट सो स्थानमा जलसम्बद्ध जीवजन्तुमा नकारात्मक असर परेको अध्ययनले देखाएको जनाइएको छ । पानी तथा लिच्चडको पूर्ण रिपोर्ट आगामी केही दिनमा थाहा हुने र पूर्ण रिपोर्ट प्राप्त भएपछि नास्टको टिमले नै त्यसको निरुपणका लागि विधि पनि सुझाव दिने जनाइएको छ । नास्टलगायत अन्य विज्ञहरूसँग समन्वय गरेर तत्कालै गर्न सकिने, मध्यमकालीन र दीर्घकालीन समाधानबारे छलफल र अभ्यास गरिने मेयर साहको भनाइ छ ।
मंगलबार नै अमृता पौडेलको नेतृत्वमा आएको टोलीले सिसडोल डाँडा अवलोकन गरेर सिसडोललाई गन्धरहित बनाउन चाहिने औषधिको मात्रा र छर्ने विधि निर्क्यौल गरेको छ । यसका लागि प्रारम्भिक कामहरू तीन दिनभित्र नै सुरु गर्ने गरी तयारी भइरहेको मेयर साहले जानकारी दिए ।