साताको पहिलो दिन आइतबार नेप्से ७१ दशमलव २० अंकले बढेर दुई हजार पाँच सय ९१ दशमलव ४२ बिन्दुमा पुगेको छ । सो दिन ‘क’ वर्गको कम्पनीमापक सेन्सेटिभ इन्डेक्स पाँच दशमलव ३८ अंकले बढेर चार सय ८२ दशमलव ७४ बिन्दुमा पुगेको छ । अघिल्लो हप्ताको चार दिन सकारात्मक लय समातेको बजारको आइतबार कारोबार रकम पनि सकारात्मक बनेको छ । ‘पर्ख र हेर’को अवस्थामा रहेका लगानीकर्ता लगानी गर्न थालेका छन् । बैंकमा देखिएको तरलता संकट कम गर्न राष्ट्र बैंकले आयातमा कडाइ गरेको छ । यसले बजारमा तरलता संकट कम गर्न सहयोग पु¥याउने राष्ट्र बैंकको ठहर छ ।
बजारले लामो करेक्सन पार गरेको सेयर बजार दबाब समूहका महासचिव नयन बाँस्तोलाले बताए । उनले भने, ‘एकपटक करेक्सन हुन आवश्यक थियो, जुन सकिएको छ । यस दिन एक सय ३२ वटा स्क्रिप्टको सेयर मूल्य बढेको छ भने ५२ वटा स्क्रिप्टको मूल्य घटेको छ । २० भन्दा बढी कम्पनीको सेयर मूल्य १० प्रतिशतले बढेर सर्किट मूल्यमा कारोबार भएको छ । १० प्रतिशतले बढेर सर्किट मूल्य लाग्नेमा अधिकांश जीवन बिमा र निर्जीवन बिमा रहेका छन् ।
कारोबारमा आएका १३ वटा समूहका सूचकमध्ये जलविद्युत् र फाइनान्स समूहका सूचक भने घटेका छन् । सर्वाधिक बढ्नेमा जिवन बिमा, निर्जीवन बिमा समूहको सूचकमा लगानीकर्ताको आकर्षण उच्च रहेको देखिएको छ । त्यस्तै, वाणिज्य बैंक, विकास बैंक, उत्पादनमूलक, माइक्रो फाइनान्सतर्फ पनि लगानीकर्ताको आकर्षण कायम रहेको छ ।
गोर्खाज फाइनान्स कम्पनीको सेयर मूल्य ५ प्रतिशतले घटेको छ, माउन्टेन इनर्जी, ग्रिन लाइफ हाइड्रोपावरको सेयर मूल्य ३ प्रतिशतभन्दा बढीले घटेको छ । धितोपत्र र ऋणपत्र गरी कारोबारमा आएका दुई सय ३१ कम्पनीको ८६ लाख कित्ता–इकाइ सेयर खरिद–बिक्री हुँदा पाँच अर्ब १७ करोड रुपैयाँको कारोबार भएको छ । सर्वाधिक कारोबार हुनेमा नबिल बैंकको ३२ करोडमाथिको कारोबार भएको छ । त्यसैगरी, हिमालयन डिस्टिलरी, नेपाल लाइफ इस्योरेन्स, शिवम् सिमेन्ट, नेपाल दूरसञ्चार कम्पनीको २६ करोडदेखि १३ करोड रुपैयाँसम्मको सेयर कारोबार भएको छ ।
