- वि.सं २o८३ असोज १४ बुधबार
हिमालय एयरलाइन्सले सोमबारदेखि काठमाडौं–सांघाई सिधा उडान पुनः सुरु गरेको छ । कम्पनीले त्रिभुवन अन्तर्राष्ट्रिय विमानस्थल र सांघाई पुडोङ अन्तर्राष्ट्रिय विमानस्थलमा सिधा उडान सुरु गरेको हो ।
उडान सेवा पुनः सुरु भएसँगै कम्पनीको काठमाडौं–सांघाई–काठमाडौं मार्गमा नियमित सिधा उडान सञ्चालन गर्ने एक मात्र वायुसेवा कम्पनी बनेको छ । यससँगै नेपाल र चीनको प्रमुख विश्वव्यापी महानगरमध्ये एक सांघाईबिचको रणनीतिक रूपमा महत्वपूर्ण हवाई सम्पर्क पुनर्स्थापित भएको बताइएको छ । कम्पनीले प्रारम्भिक चरणमा यस रुटमा साप्ताहिक दुई उडान सञ्चालन गर्दै छ । काठमाडौं–सांघाईतर्फका उडान हरेक सोमबार र शुक्रबार प्रस्थान गर्नेछन् भने सांघाई–काठमाडौं फर्कने उडान हरेक मंगलबार र शनिबार सञ्चालन हुनेछन् । एयरलाइन्सले यात्रुको माग तथा उडानको यात्रु भारका आधारमा आगामी दिनमा उडान संख्या थप गर्ने बताइएको छ ।
यो उडानले यात्रुलाई सुविधाजनक, सुरक्षित र प्रभावकारी यात्रा सेवा प्रदान गर्ने हिमालय एयरलाइन्सको प्रतिबद्धतालाई थप मजबुत बनाएको कम्पनीको भनाइ छ । साथै, यसले नेपाल–चीन द्विपक्षीय सम्बन्ध तथा दुई देशका जनताबिचको सम्पर्क र आदान–प्रदानलाई थप सुदृढ बनाउन महत्वपूर्ण योगदान पुर्याउने अपेक्षा गरिएको छ ।
