- वि.सं २o८३ भदौ १० बुधबार
भोटेकोशीमा आएको बाढीपछि रसुवाका स्थानीय अर्जुन न्यौपानेले आफू सुरक्षित रहेको जानकारी दिँदै आफन्तजन तथा शुभेच्छुकलाई भावुक अपिल गरेका छन्।
न्यौपानेले सामाजिक सञ्जालमार्फत आफू अहिले मैलुङ भिरमा सुरक्षित रहेको र अन्य पाँचजनासहित गरी ६ जना ओडारमा रहेको बताएका छन्। उनले आफूहरू सुरक्षित भए पनि आसपासका बस्तीप्रति चिन्ता व्यक्त गर्दै उद्धार र सुरक्षामा तत्काल ध्यान दिन आग्रह गरेका छन्। ‘म सुरक्षित छु। साथीहरू सबै देखेका छैनौँ। हामी ६ जना ओडारमा छौँ,’ उनले लेखेका छन्।
उनले विशेषगरी खाल्टे, बेत्रावती र त्रिशूली–बट्टार क्षेत्रका बस्तीलाई बाढीबाट जोगाउन आग्रह गरेका छन्। आफूहरूलाई तत्काल उद्धारभन्दा पनि जोखिममा रहेका बस्ती र स्थानीयको सुरक्षालाई प्राथमिकता दिन उनको अपिल छ।
‘कृपया खाल्टे, बेत्रावती, त्रिशूली–बट्टारको बस्ती बचाइदिनुस्। अरूलाई र हामीलाई अहिलेलाई पर्दैन। मैलुङ भिरमा सुरक्षित छौँ। पिर नमान्नुस् है आफन्तजन,’ न्यौपानेले भावुक हुँदै भनेका छन्।
