बाढीले बगाएर ल्याएको शवबाट सुनको गहना निकाल्ने दुई पक्राउ 

रसुवाको भोटेकोशी नदीमा आएको भीषण बाढीले बगाएर त्रिशूली–नारायणी नदीकिनारमा ल्याएको शवबाट कानको सुनको मुन्द्रा लुछेको आरोपमा चितवन प्रहरीले दुईजनालाई पक्राउ गरेको छ । 

मानवताको संवेदनशीलता नै गुमाएको उक्त घटनाको भिडियो सामाजिक सञ्जालमा सार्वजनिक भएपछि प्रहरीले उनीहरूको पहिचान गरी नियन्त्रणमा लिएको हो ।

जिल्ला प्रहरी कार्यालय चितवनका प्रमुख प्रहरी उपरीक्षक (एसपी) रामेश्वर पौडेलका अनुसार बुधबार दिउँसो दुई जनालाई पक्राउ गरी घटनाबारे थप अनुसन्धान सुरु गरिएको छ ।
पक्राउ पर्नेमा नवलपरासीको विनयी त्रिवेणी गाउँपालिका–१ स्थायी घर भई हाल भरतपुर महानगरपालिका–१ लीलाचोकमा मामाघर बस्दै आएका २५ वर्षीय मदन गुरुङ र सुनसरीको चाँदबेला नगरपालिका–५ स्थायी घर भई हाल भरतपुर महानगरपालिका–२ पोखरा बसपार्कस्थित सुपारीटोलमा बस्दै आएका ३८ वर्षीय उमेश चौधरी रहेका छन् ।

एसपी पौडेलका अनुसार बाढीले बगाएर ल्याएको शवबाट कानमा लगाइएको सुनको मुन्द्रा निकालिरहेको दृश्य सामाजिक सञ्जालमा भाइरल भएपछि प्रहरीले तत्काल भिडियोको सत्यता जाँच गर्न थालेको थियो । भिडियोमा देखिएका व्यक्तिहरूको पहिचान खुलाएपछि उनीहरूलाई नियन्त्रणमा लिइएको हो ।

’सामाजिक सञ्जालमा सार्वजनिक भएको भिडियोको आधारमा उनीहरूको पहिचान गरी पक्राउ गरिएको हो। घटनाबारे विस्तृत अनुसन्धान भइरहेको छ,’ एसपी पौडेलले भने ।
प्रहरीका अनुसार शवको सम्मान र प्रमाण संरक्षणसँग जोडिएको विषय भएकाले घटनालाई गम्भीर रूपमा लिएर अनुसन्धान अघि बढाइएको छ । पक्राउ परेका दुवै जनामाथि प्रचलित कानुनअनुसार आवश्यक कारबाही प्रक्रिया अघि बढाइने प्रहरीले जनाएको छ ।

रसुवाको भोटेकोशी नदीमा आएको भीषण बाढीपछि त्रिशूली र नारायणी नदी किनारमा शव फेला पर्ने क्रम जारी छ । खोज तथा उद्धार अभियानसँगै शवको सनाखत र व्यवस्थापनको काम भइरहेको बेला शवबाट सुनको गहना लुछ्ने घटना सार्वजनिक भएपछि सामाजिक सञ्जालमा व्यापक आलोचना भएको थियो ।