Skip This
सिराहाको धनगढीमाई नगरपालिकाका वडाध्यक्षहरूले आर्थिक वर्ष ०८१/८२ का लागि बजेट तथा कार्यक्रम पारित गर्न तत्काल नगरसभा बोलाइनुपर्नेसहित तीनबुँदे माग गरेपछि नगर कार्यपालिकाको बैठक बोलाइएको छ ।
कार्यपालिका सदस्यसमेत रहेका वडाध्यक्षहरूले आर्थिक वर्ष ०८१/८२ का लागि कार्यक्रम तथा बजेट पारित गर्न तत्काल नगर कार्यपालिकाको बैठक गरी नगरसभाको मिति तोक्न सोमबार २४ घण्टे अल्टिमेटम दिएपछि मंगलबार नगर कार्यपालिकाको बैठकका लागि पत्राचार गरिएको छ ।
प्रमुख प्रशासकीय अधिकृत राजकुमार दासले नगर उपप्रमुख, १ देखि १४ नम्बर वडासम्मका वडाध्यक्षहरू र नगर कार्यपालिका सदस्यहरूलाई आगामी २ भदौको दिउँसो नगर कार्यपालिकाको बैठक गर्ने गरी पत्राचार गरेका हुन् ।
गत २८ असारमा १२औँ नगरसभाअन्तर्गत पारित गर्न लागिएको बजेट तथा कार्यक्रम विवादका कारणले रोकिएको एक महिनापछि नगरका ११ र १२ बाहेकका १, २, ३, ४, ५, ६, ७, ८, ९, १०, १३ र १४ नम्बर वडाका वडाध्यक्षहरूले सोमबार संयुक्त प्रेस विज्ञप्तिमार्फत यथाशीघ्र नगरसभाको मिति तय गर्न माग गरेका थिए।
