बिहिबार दिउँसो हेटौंडा उपमहानगरपालिका–९ स्थित नवदुर्गा आयल स्टोर्सको कम्पाउण्डमा डिजेल चोरी गर्दै गर्दा पक्राउ परेको ना७ख २७९४ नम्बरको ट्यांकरलाई काठमाडौंको थानकोटस्थित आयल निगमको बागमती प्रादेशिक कार्यालय ल्याइएको छ ।
शुक्रबार बिहान करिब १० बजे ट्यांकर डिपो भित्र आएको र अहिले चोरी घटनाबारे बुझ्ने काम भइरहेको थानकोट डिपो प्रमख अशोक साहले जानकारी दिए । ‘डिजेल चोरीमा संलग्न ट्यांकर केही समयअघि डिपो भित्र आएको छ । अहिले कसरी तेल चोरी भएको हो, संलग्नलाई के कस्तो कारबाही गर्ने भन्ने बिषयमा छलफल भइरहेको छ’ उनले भने ।
डिपोले चोरी घटनामा चालकलाई दोष देखाएर कारबाहीका लागि केन्द्रिय कार्यालयमा सिफारिस गर्ने तयारी गरेको छ । यद्यपी, थानकोट डिपोको अपरेसन विभागमा कार्यरत कर्मचारीको संरक्षणमा चालकले डिजेल चोरी गरेको आशंका गरिएको छ ।
अपरेसन विभागमा कार्यरत कर्मचारीहरुले चालकबाट आर्थिक लाभ लिएर ट्यांकरमा भएको भन्दा बढी तेल रहेको उल्लेख गर्दै अभिलेख राख्ने गरेको स्रोतको भनाई छ । ‘पछिल्लो समय थानकोट डिपोको अपरेसन विभागमा कार्यरत कर्मचारीहरुले ट्यांकरमा आएको तेलको सही डिप लिन छाडेका छन् । चालकले जति तेल छ भन्यो, त्यसलाई नै सदर गर्ने प्रवृत्ति बढेको छ’ स्रोतले भन्यो ।
ट्यांकरमा थोरै तेल भएपनि कर्मचारीहरुले मिलेमतोमा धेरै तेल रहेको देखाएर भण्डारण गृहमा खन्याउने गरेका छन् । भण्डारण गृहमा खन्याउँदा अपुग हुन आएको परिमाण बराबरको तेल तापक्रम र ढुवानीका क्रममा नोक्सानी भएको देखाउने गरिएको छ । यो प्रवृत्तिले चालक–सहचालक र कर्मचारीलाई आर्थिक लाभ भएपनि निगमलाई भने संस्थागत नोक्सानी हुने गरेको छ ।
कम तेल लिएर आएका ट्यांकरमा बढी तेल रहेको अभिलेख राखिदिए बापत थानकोट डिपोको अपरेसन विभागमा रहेका कर्मचारीहरुले चालकबाट १ हजारदेखी पाँच हजार रुपैयाँसम्म दरले असुल्ने गरेको स्रोतको भनाई छ ।
त्यस्तै पेट्रोलपम्पका लागि ‘डाइभर्ट’ हुने ट्यांकरमा रहेको तेलको समेत नापजाँचमा लापरबाही गर्ने गरिएको स्रोतको भनाई छ । ‘पम्पलाई पठाउने ट्यांकरमा के कति तेल छ भनेर नापजाँच नै नगरी पठाउँदा कतिपय पम्पले मागेभन्दा कम तेल पाएको भनेर गुनासो गर्न थालेका छन्’ स्रोतले भन्यो । ललितपुरका एक पम्प संचालकले केही दिनअघि मात्रै निगमको थानकोट डिपोले कम तेल दिएको भन्दै पेट्रोलियम डिलर्स राष्ट्रिय एसोसिएसनमा गुनासोसमेत गरेका थिए ।
थानकोट डिपो प्रमुख साहले भने कर्मचारीलाई कुनै पनि घटनामा आशंका गर्न नमिल्ने दाबी गरे । ‘कर्मचारीको कमजोरी छ भन्ने कुरामा मलाई विश्वास छैन’ उनले भने ।
बिहिबार दिउँसो हेटौंडा प्रहरीले स्थनीय बासिन्दाको उजुरीपछि डिजेल चोरी गर्दैगर्दा ट्यांकर नियन्त्रणमा लिई चालक अलाम हवारी र नवदुर्गा आयल स्टोर्सका कर्मचारी बिरेन्द्र साहलाई पक्राउ गरेको थियो । सो पम्पमा बारम्बार ट्यांकर रोकेर तेल चोरी हुने घटना दोहोरिन थालेपछि स्थानीयले प्रहरीलाई उजुरी दिएका थिए।
बिहिबार दिउँसो नयाँ पत्रिकाको सम्पर्कमा आएका हेटौंडा रातोमोटेका एक स्थानीयले पटक पटक ट्यांकरबाट तेल झिकेर चोरी गर्न थालेपछि प्रहरीलाई खबर गरेको बताएका थिए । ‘यहाँ ट्यांकर रोकेर तेल झिक्ने क्रम बढ्न थालेपछि हामीले प्रहरीलाई खबर गरेर समाउन लगाएका थियौं’ ती स्थानीयले नयाँ पत्रिकामा टेलिफोन गरी भनेका थिए ।