- वि.सं २o८१ बैशाख १८ मंगलबार
प्रमुख प्रतिपक्षी दल एमालेले संसदमा उठेका सवालको जवाफ दिनभन्दा प्रधानमन्त्री संसद् छलेर हिँडिरहेको आरोप लगाएको छ ।
प्रतिनिधिसभाको आजको बैठकको सुरुमै आकस्मिक समय लिएर एमाले प्रमुख सचेतक पदम गिरीले प्रधानमन्त्री पुष्पकमल दाहाल प्रचण्ड संसद् छलेर हिँडिरहेको आरोप लगाएका हुन् ।
उनले बदनियत बोकेका र छानबिनमा रहेका मन्त्रीलाई बर्खास्त गर्न सरकारको पुनः ध्यानाकर्षण गराए । विवादित मन्त्रीहरूका सम्बन्धमा संसदमा उठेको सवालको जवाफ संसदमै उपस्थित भएर प्रधानमन्त्रीले दिनुपर्ने उनले माग दोहोर्याए ।
‘प्रधानमन्त्री संसद् छलेर बाहिर हिँडिराख्नुभएको छ । यो चिन्ताको विषय हो । हामी संसद् अवरोध होस् भन्ने चाहँदैनौँ,’ उनले भने, ‘तर, मर्यादित र संयमित ढंगले संसदमा प्रस्तुत हुँदा पनि सरकार सुन्न तयार देखिएको छैन ।’
उनले मुलुकमा सुशासनका निम्ति प्रमुख प्रतिपक्षी दलले खबरदारी गर्दै आएको पनि बताए ।
भौतिक पूर्वाधार तथा यातायातमन्त्री प्रकाश ज्वाला, स्वास्थ्य तथा जनसंख्यामन्त्री मोहनबहादुर बस्नेत तथा पर्यटन तथा नागकिरक उड्डयनमन्त्री सुदन किराँतीलाई बर्खास्त गर्न एमालेसमेतका प्रतिपक्षी दलहरूले माग गरिरहेका छन् ।
