१८औँ वार्षिकोत्सव विशेषांकफ्रन्ट पेजमुख्य समाचारसमाचारनयाँ यात्रा २०२५दृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २o८o जेठ ९ मंगलबार
  • Sunday, 11 May, 2025
२o८o जेठ ९ मंगलबार १२:o२:oo
Read Time : < 1 मिनेट
समाचार डिजिटल संस्करण

बैतडीको सिगास गाउँपालिका अध्यक्षविरुद्ध कुटपिट र गालीबेइज्जती मुद्दा

Read Time : < 1 मिनेट
नयाँ पत्रिका
२o८o जेठ ९ मंगलबार १२:o२:oo

बैतडीको सिगास गाउँपालिका अध्यक्ष हरिसिंह धामीविरुद्ध जिल्ला अदालत बैतडीमा कुटपिट र गालीबेइज्जती मुद्दा दर्ता भएको छ । सिगास– ४ को कान्धार देउलेक सडक निर्माण समितिका अध्यक्ष वीरसिंह धामीले पालिका अध्यक्ष धामीविरुद्ध उक्त मुद्दा दर्ता गरेका हुन् । गत मंगलबार सडक निर्माणको क्रममा दोस्रो किस्ताबापतको रनिङ बिलमा पालिकाले २० लाख ४४ हजार रकमको चेक उपभोक्ता समितिलाई दिएको थियो ।

तर, चेक साट्न गाँजरीमा रहेको कृषि विकास बैंक पुग्दा अध्यक्षले उक्त चेक नसाट्न पत्रचार गरेको भन्दै बैंकले भुक्तानी दिन मानेन । चेक नसाटिनुको कारण बुझ्न पुनः पालिका केन्द्र गर्जे जाँदा अध्यक्षले गालीगलौज र कुटपिट गरेपछि उपभोक्ता समितिअध्यक्ष धामी जिल्ला अस्पताल बैतडीमा भर्ना भएका थिए । हाल उपचारकै क्रममा रहेका उनले पालिका अध्यक्ष धामीविरुद्ध सोमबार अदालतमा मुद्दा दर्ता गराएका हुन्। 

उक्त मुद्दामा पालिका अध्यक्षले सात लाख रकम माग्दा विवाद सिर्जना भएको र सोही क्रममा गालीगलौज गर्दै कुटपिट गरेको पीडित धामीले आरोप लगाएका छन्। अध्यक्ष धामीले सार्वजनिक पदको दुरुपयोग गर्दै कुटपिटपछि उल्टै रातभरि प्रहरी चौकीमा थुन्न लगाएको पीडितले बताएका छन्।

गाली–गलौज गर्दै लात्ता, मुक्का र लाठीले कुटपिट गरेकाले उनीमाथि कैद र जरिवानाका साथै उपचार खर्च माग गरिएको छ। जिल्ला अदालत बैतडीका निमित्त स्रेस्तेदार तीर्थ आचार्यले प्रतिवादी पालिका अध्यक्ष धामीले २१ दिनभित्र अदालतमा हाजिर हुनुपर्ने बताए।अध्यक्ष धामीले भने उपभोक्ता समितिका अध्यक्ष वीर सिंहले मदिरा सेवन गरेर पालिका कर्मचारी र अध्यक्षसँग दुर्व्यवहार गरेको दाबी गरेका छन्। उनले किर्ते कागजपत्र बनाएर भुक्तानी लिएको थाहा पाएपछि बैंकलाई चेक नसाट्न अनुरोध गरेको उनको भनाइ छ। अध्यक्ष धामीले सात लाख कमिसन मागेको भन्ने झुटा आरोप भन्दै विज्ञप्तिसमेत जारी गरेका थिए।