मुख्य समाचारफ्रन्ट पेजसमाचारदृष्टिकोणअर्थअन्तर्वार्ताखेलकुदविश्वफिचरप्रदेशपालिका अपडेट
  • वि.सं २०८० चैत १६ शुक्रबार
  • Friday, 29 March, 2024
२०८० बैशाख २२ शुक्रबार ०८:००:००
Read Time : < 1 मिनेट
समाचार डिजिटल संस्करण

गलत आचरणबाट टाढा रहन प्रहरी कर्मचारीलाई आइजिपीको निर्देशन

Read Time : < 1 मिनेट
२०८० बैशाख २२ शुक्रबार ०८:००:००

प्रहरी महानिरीक्षक (आइजिपी) वसन्तबहादुर कुँवरले गलत आचरणबाट टाढा रहन सबै प्रहरी युनिटलाई निर्देशन दिएका छन् । जिल्ला प्रहरी कार्यालय गुल्मीको बिहीबार नवनिर्मित भवनहरूको उद्घाटन गर्दै महानिरीक्षक कुँवरले यस्तो निर्देशन दिएका हुन् । 

आन्तरिक सुदृढीकरण पहिलो आवश्यकता भएको बताउँदै आइजिपी कुँवरले भने, ‘नागरिकका बीचमा जानुभन्दा पहिले आफू सुध्रिनु जरुरी छ ।’ भौतिक संरचना निर्माणले मात्रै नहुने भएकाले प्रहरी कर्मचारी ज्ञान र सीपमा पनि अब्बल बनाउनुपर्नेमा कुँवरले जोड दिए । 

उनले व्यक्तिगत स्वार्थभन्दा माथि उठेर संगठनको उद्देश्य प्राप्तिमा लागे नागरिकमैत्री सेवा र विश्वास कायम रहने भएकाले गलत आचरणबाट टाढा रहन सबै प्रहरी युनिटहरूलाई निर्देशन दिए ।

‘विवेकलाई कसैले ढाँट्न हुँदैन । घटनाको तथ्यमा सबैको धारणा समान हुनु जरुरी छ,’ उनले भने, ‘स्वार्थका कारण बुझाइ फरक हुँदा प्रहरीलाई अनुसन्धानमा अप्ठ्यारो पर्ने गरेको छ ।’  सीमित स्राेत र साधनबीच पछिल्लो पाँच वर्षमा तीव्र रूपमा पूर्वाधार निर्माण गरिएको उनकाे भनाइ थियाे ।

जिल्ला प्रहरी कार्यालय गुल्मी र बिकोई सुनील समीर निर्माण सेवाबीच ०७६ चैत ६ गते भवन निर्माण सम्झौता भएको थियो । ६ करोड ६८ लाख २६ हजार तीन सय ५६ रुपैयाँको लागतमा भवन निर्माण गरिएको जिल्ला प्रहरी कार्यालय गुल्मीका प्रमुख प्रहरी उपरीक्षक नवीनकिशोर प्रधानले जानकारी दिए । 

जिल्ला प्रहरी कार्यालयको आफ्नै जग्गामा कार्यालय प्रमुख निवास, सिनियर प्रहरी अधिकृत निवास, ब्यारेक, मेस तथा हिरासत कक्ष भवनहरू निर्माण भएका छन् ।