- वि.सं २o८१ बैशाख २४ सोमबार
मिटरब्याजसम्बन्धी समस्या समाधान गर्न सरकारले गठन गरेको जाँचबुझ आयोगले पीडितहरूसँग उजुरी आह्वान गरेको छ । ७७ जिल्लाकै जिल्ला प्रशासन कार्यालयबाट उजुरी गर्न सकिने आयोगले जनाएको छ ।
उजुरीलाई व्यवस्थित गर्न सबै जिल्ला प्रशासन कार्यालयमा मिटरब्याजपीडित सहायता कक्ष स्थापना गरिएको छ । जहाँ कर्मचारीले नै निवेदन फारम भराइदिने आयोगले जनाएको छ । १७ देखि ३१ वैशाखसम्म उजुरी दिन आयोगले आग्रह गरेको छ ।
एक वर्षअघि पनि सरकारले पीडितहरूसँग उजुरी मागेको थियो । त्यतिवेला करिब तीन हजार उजुरी परेका थिए । यसपटक उजुरीलाई सुरुमै वर्गीकरण हुने गरी निवेदनको ढाँचा तयार गरिएको छ । उजुरीलाई सुरुमै वर्गीकरण गरेर त्यहीअनुसार छानबिनअघि बढाइने आयोगका सदस्य उत्तमराज सुवेदीले जानकारी दिए ।
गत २० चैतमा सरकारले विशेष अदालतका पूर्वअध्यक्ष गौरीबहादुर कार्कीको अध्यक्षतामा आयोग गठन गरेको थियो । हाल आयोगका पदाधिकारीले गृह मन्त्रालयमै बसेर पुराना प्रतिवेदनहरूको अध्ययन गरिरहेका छन् ।
आगामी १७ वैशाखदेखि जनकपुरमा कार्यालय स्थापना गरी काम सुरु गरिने आयोगले जनाएको छ । जनकपुरको हुलाक कार्यालयमा आयोगको कार्यालय राख्न लागिएको छ ।
मिटरब्याजपीडितहरूसँग भएको सम्झौताअनुसार सो आयोग गठन भएको हो । तर, पीडितको अर्काे समूह आयोगले न्याय दिनेमा विश्वस्त नभई तीन सातादेखि काठमाडौंमा आन्दोलन गर्दै आएका छन् ।
