नेपालमा सञ्चालित ३६ मैदा मिललाई यस वर्ष करिब १० लाख टन गहुँ आवश्यक रहेको नेपाल मैदा उद्योग संघले जनाएको छ । मैदा मिलले खपत गर्ने गहुँमध्ये साढे तीन लाख टन गहुँ आन्तरिक उत्पादनबाट परिपूर्ति हुन्छ भने साढे ६ लाख टन गहुँ भारतबाट आयात गर्नुपर्ने संघका अध्यक्ष कुमुद दुगडले बताए ।
संघको प्रतिनिधिमण्डलले उद्योग तथा वाणिज्य मन्त्रालयका सचिवलाई भेटेर घरेलु उत्पादनले मात्र माग धान्न नसक्ने जानकारी गराउँदै भारतबाट गहुँ आयातलाई सहजीकरण गरिदिन आग्रह गरेका छन् । संघका अध्यक्ष दुगडले ३० वैशाख ०७९ देखि भारत सरकारले नेपालमा गहुँ निर्यातमा प्रतिबन्ध लगाएका कारण देशका मैदा उद्योगहरूले भोग्नुपरेको समस्या अवगत गराए ।
छलफलमा सचिवले स्वदेशी उद्योग संरक्षण गर्न सरकारको तर्फबाट गहुँ आयातको प्रक्रिया अगाडि बढिसकेको जानकारी गराए । सरकारले गरेको प्रक्रिया हेर्दा १५ देखि २० दिनमा नेपालमा गहुँ आउने अवस्था देखिएकाले स्वदेशी मैदा उद्योगहरू निरन्तर सञ्चालन हुने संघले विश्वास लिएको छ ।
